आजी-आजोबादेखत नातवंडानी सोडला प्राण…टिप्पर थेट दुचाकीच्या…

पळशी सुपो येथून शेगाव कडे येणाऱ्या मोटरसायकलला भेंडवळ जवळील माऊली फाटा येथे भरधाव जाणाऱ्या टिप्परने जोरदार धडक दिली. यामध्ये मोटरसायकल वरील दोन बालके जागीच ठार तर दोन जण गंभीर जखमी झाले आहेत. आपल्या आजी आजोबा सोबत दोन्ही नातवंड हे शेगावकडे येत होते.  पळशी सुपो (  तालुका जळगाव जामोद जिल्हा बुलढाणा) येथून प्रकाश महादेव खेडकर आणि साधना प्रकाश खेडकर हे पती-पत्नी आपल्या दोन नातवंड पार्थ चोपडे (वय ६, राहणार राजापेठ अमरावती) आणि युवराज मोहन भागवत (वय ५ वर्ष राहणार बडनेरा, जिल्हा अमरावती )या दोघांसह मोटरसायकलने शेगाव कडे निघाले होते. दरम्यान माऊली फाटा येथे मागून भरधाव वेगाने येणाऱ्या टिप्परने या मोटरसायकलला चिरडले. या भीषण अपघातामध्ये दोन्ही नातवंडांचा जागीच मृत्यू झाला.  आजी आणि आजोबा गंभीरित्या जखमी झाले असून त्यांच्या डोळ्यादेखत दोन्ही लाडक्या नातवंडांचा दुर्देवी करुण अंत झाला. अपघात घडताच माऊली फाटा परिसरात असलेल्या ग्रामस्थ, प्रवासी, लघु व्यावसायिक यांनी घटना स्थळाकडे  धाव घेत मदत केली. काही नागरिकांनी पोलिसांना घटनेची माहिती दिली.

घटनेची माहिती मिळताच जळगाव जामोद पोलीस ठाण्याचे ठाणेदार  व कर्मचारी माऊली फाट्यावर आले. खामगाव विभागाचे अपर पोलीस अधीक्षक श्रेणिक लोढा हे सुद्धा घटनास्थळी पोहोचले . पोलिसांनी गंभीर जखमीना उपचार  साठी रुग्णालयात हलविले. बालकांचे मृतदेह विच्छेदना साठी पाठविण्यात आले. अपघात स्थळाचा पंचनामा करुन पोलिसांनी वाहतूक सुरळीत केली. अपघातची माहिती अमरावती व बडनेरा येथील नातेवाईकांना देण्यात आली.