स्वदेशी बनावटीची यंत्रणा सांगणार युद्ध विमानाचे नेमके स्थान; अंतिम चाचणीनंतर हवाई दलात होणार समावेश

एअर मार्शल पांडे म्हणाले, ही यंत्रणा उपग्रहावर आधारित आहे. सध्या तिचे काम अंतिम टप्प्यात आहे. पूर्वेकडील क्षेत्रात (ईस्टर्न सेक्टर) शेवटची चाचणी व्हायची आहे. ती झाली की हवाई दलात यंत्रणा कार्यान्वित होईल. या यंत्रणेमुळे युद्ध विमान नेमके कुठे आहे याची क्षणाक्षणाला माहिती मिळणार आहे. एखाद्या विमानाचा अपघात झाल्यास काही वेळात ती जागा शोधणे शक्य होणार आहे.

हेही वाचा… वाढत्या अपघातांसोबत आता ‘समृद्धी’ वर ‘ही’ टोळी सक्रिय

या यंत्रणेच्या सर्व चाचण्या पूर्ण झाल्या आहेत. अंतिम चाचणी पूर्वेकडील क्षेत्रात होणार आहे. हवाई दल आत्मनिर्भर होण्याच्या दृष्टीने पावले टाकण्यात आली आहेत. बऱ्याच वस्तू स्वदेशी बनावटी आहेत. या प्रकल्पाबाबत बोलायाचे झाल्यास ‘आरटीएटीएस’ याचा उल्लेख करावा लागेल. हा प्रकल्प संपूर्णत: स्वदेशी बनावटीचा आहे, असेही पांडे यांनी सांगितले.

हेही वाचा… यवतमाळ : पुरात ४५ जण अडकले, उपमुख्यमंत्री देवेंद्र फडणवीस यांच्याकडून दखल; भारतीय हवाई दलाचे दोन हेलिकॉप्टर्स लवकरच पोहोचणार

भारतीय हवाई दलास एअरबस कंपनी ‘सी२९५’ या विमानांचा पुरवठा होणार आहे. त्यासाठी झालेल्या करारानुसार, १६ विमाने स्पेनमधून तयार होऊन येतील आणि ४० विमाने गुजरातमधील कारखान्यात तयार केले जातील. हे विमान भारतीय हवाई दलातील एव्हीओ या जुन्या विमानाची जागा घेणार आहेत. खासगी कंपन्यांच्या गुंतवणुकीशिवाय भारत संरक्षण क्षेत्रात आत्मनिर्भर होऊ शकत नाही का, या प्रश्नावर पांडे म्हणाले, जितके जास्त लोक या क्षेत्रातील येतील तेवढे चांगले आहे. एकापेक्षा अधिक लोकांचा सहभाग केव्हाही फायदेशीर असतो.