नागपूर : केंद्रीय मंत्री नितीन गडकरी जेवढे चर्चेत असतात, तेवढ्याच त्यांच्या पत्नी प्रसिद्धीपासून दूर असतात. मात्र, समाजकार्यात अग्रेसर असलेल्या कांचन गडकरी शेतीतही वेगवेगळे प्रयोग राबवत असतात. नितीन गडकरी यांनी नुकतेच त्यांच्या ‘एक्स’ अकाउंटवरुन कांचन गडकरी यांच्या या अनोख्या प्रयोगाबद्दलची माहिती दिली.
केंद्रीय मंत्री नितीन गडकरी यांच्या पत्नी कांचन गडकरी यांनी नागपूरमधील धापेवाडा येथील भक्ती फार्ममध्ये ८०० ग्रॅम ते १ किलो वजनाच्या कांद्याचे उत्पादन घेतले आहे. केंद्रीय मंत्री नितीन गडकरी यांनी स्वतः ‘एक्स’वर याबाबतचा एक व्हिडिओ पोस्ट करून कांचन गडकरी यांचे कौतुक केले आहे. यासोबतच बियाणे कुठून आणले गेले आणि त्याच्या उत्पादनात कोणते तंत्रज्ञान वापरले गेले याची माहिती देखील दिली आहे. कांद्याच्या या बिया नेदरलँड्समधून आणण्यात आल्या होत्या. सेमिनिस कंपनीचे हे २.५ किलो बियाणे एक एकर जमिनीत पेरण्यात आले. तिथे ४५ दिवस रोपवाटिका तयार करण्यात आली. यानंतर, वाढलेली रोपे दुसऱ्या ठिकाणी लावण्यात आली.
दुहेरी ठिबक सिंचन करण्यात आले. या मातीत सेंद्रिय खत मिसळले गेले. यानंतर, या बेडवर मल्चिंग पेपर ठेवण्यात आला, त्यात छिद्रे पाडण्यात आली आणि रोपे लावण्यात आली. सुमारे २४ हजार कांद्याची रोपे लावण्यात आली. या काळात, रोपे न जगण्याचा दर सात ते दहा टक्के होता, जो कृषी प्रमाणापेक्षा कमी होता. शेवटी कांद्याचे उत्पादन झाले आणि एका कांद्याचे वजन ४०० ग्रॅम ते ८००-१००० ग्रॅम होते. गडकरी यांनी एका एकरातून १२ ते १३ टन उत्पादन घेतले आहे. या काळात सर्व प्रकारची खबरदारी घेण्यात आली. एवढेच नाही तर केंद्रीय मंत्री गडकरी यांनी असेही आश्वासन दिले आहे की, जर कोणत्याही शेतकऱ्याला सेंद्रिय शेती करायची असेल तर आम्ही त्याला पूर्ण सहकार्य करू.
खरीप हंगामात महाराष्ट्र, कर्नाटक आणि आंध्र प्रदेश या राज्यांमध्ये कांद्याची लागवड मोठ्या प्रमाणात केली जाते.तथापि, जर कोणतीही नैसर्गिक आपत्ती आली तर कांद्याचे उत्पादन कमी होते, ज्यामुळे देशात कांद्याची टंचाई निर्माण होते आणि किंमती वाढतात. नाशिक, पुणे आणि सोलापूर पट्ट्यात कांद्याचे उत्पादन मोठ्या प्रमाणात होते. अजूनही असे मानले जाते की लाल कांद्याच्या उत्पादनात नाशिक जिल्ह्याची ‘मक्तेदारी’ आहे. प्रत्यक्षात, ते पाच-सात वर्षांपूर्वी ती संपुष्टात आली. गेल्या पाच वर्षांपासून मध्य प्रदेश, गुजरात, राजस्थान आणि कर्नाटकमध्ये लाल कांद्याचे मोठ्या प्रमाणात उत्पादन होत आहे.
