नागपूर : केंद्रातील मंत्री आणि भाजपचे माजी राष्ट्रीय अध्यक्ष नितीन गडकरी हे तिसऱ्यांदा नागपूर लोकसभा मतदारसंघातून निवडणूक लढत आहे. महाविकास आघाडीतील काँग्रेस नागपूरची जागा लढवत आहे. काँग्रेसने यावेळी आणखी उमेदवार बदलला आहे.
गडकरी २०१४ मध्ये काँग्रेसचे माजी केंद्रीय मंत्री विलास मुत्तेमवार यांच्याविरुद्ध पहिल्यांदा लोकसभा निवडणूक लढले आणि विजयी झाले. त्यानंतर २०१९ मध्ये काँग्रेसने प्रदेशाध्यक्ष नाना पटोले यांना नागपुरातून उमेदवारी दिली. त्यांचाही पराभव झाला. आता आमदार विकास ठाकरे हे नितीन गडकरी यांच्याविरुद्ध लढत आहे. लोकशाही आणि राज्यघटना वाचवण्यासाठी ही निवडणूक महत्वाची असल्याचे सांगून काँग्रेसला मतदान करण्याचे आवाहन केले जात आहे.
महाविकास आघाडीचे नेते नागपुरात काँग्रेसच्या उमेदवारासोबत आहे. राष्ट्रवादी काँग्रेसचे (शरद पवार गट) अध्यक्ष शरद पवार यांचे सोमवारी नागपूरला आगमन झाले. वर्धा लोकसभेची जागा शरद पवार गटाकडे गेली आहे. तेथे काँग्रेसचे माजी आमदार अमर काळे हे राष्ट्रवादीकडून निवडणूक लढवणार आहे. आज काळे यांनी अर्ज भरला. त्यावेळी शरद पवार उपस्थितीत होते. वर्ध्याकडे रवाना होण्यापूर्वी काँग्रेसचे नागपूरचे उमेदवार विकास ठाकरे यांनी शरद पवार यांची भेट घेतली. शरद पवार आणि नितीन गडकरी यांचे मैत्रीपूर्ण संबंध आहेत. गडकरी हे शरद पवार यांना राजकारण, समाजकारण आणि विकास मुद्यांवर मार्गक्रमण करीत असल्याचे दिसून येते. या पार्श्वभूमीवर गडकरी विरुद्ध लढत असलेल्या ठाकरे यांना शरद पवार यांचा कानमंत्र महत्वाचा ठरतो. विकास ठाकरे आणि शरद पवारांनी सुमारे तासभर चर्चा केली. यावेळी माजी गृहमंत्री अनिल देशमुख देखील शरद पवार यांच्यासोबत होते.
