जरांगे-भुजबळ संघर्षावर सहकारमंत्री वळसे पाटलांचे तोंडावर बोट! म्हणाले, “मला वादग्रस्त विषयात ओढूच नका”

बुलढाण्याचे पालकमंत्री वळसे पाटील दोन दिवसांच्या जिल्हा दौऱ्यावर आहेत. आज त्यांच्या अध्यक्षतेखाली जिल्हा नियोजन समितीची बैठक आहे. या व्यस्ततेत माध्यमाशी बोलताना त्यांनी मराठा विरुद्ध ओबीसी संघर्ष, मंत्री छगन भुजबळ विरुद्ध मनोज जरांगे पाटील शाब्दिक संघर्ष, या वादग्रस्त विषयांवर बोलण्यास स्पष्ट नकार दिला. मी दोन दिवसांपासून आढावा बैठकांत व्यस्त आहे. त्यामुळे या घडामोडींबद्दल अनभिज्ञ आहे आणि तसेही तुम्ही मला या वादग्रस्त विषयांमध्ये ओढूच नका, असे त्यांनी सांगितले.

हेही वाचा – वर्धा : उद्योग मंत्री उदय सामंत म्हणतात, विनाउद्योग भूखंड परत घ्यावे

धनगर समाजाच्या भावना वरिष्ठांपर्यंत पोहोचविणार

जिल्ह्यातील धनगर समाजाच्या शिष्टमंडळाने आपली भेट घेऊन चर्चा केली. त्यांच्या भावना आपण मुख्यमंत्री, दोन्ही उपमुख्यमंत्री यांच्यासह कोअर समितीपर्यंत पोहोचवणार आहे. बुलढाणा जिल्हा सहकारी बँकेला ३०५ कोटींचे ‘सॉफ्ट लोन’ देण्यास राज्य बँकेने तत्वतः मान्यता दिली आहे. आमदार राजेंद्र शिंगणे यासाठी प्रयत्नशील आहेत. मीदेखील यात लक्ष घातले असून सरकार व राज्य सहकारी बँकेच्या संपर्कात असल्याची माहितीही पालकमंत्र्यांनी दिली.

हेही वाचा – चंद्रपूर : बल्लारपूरमध्ये मैदानी खेळ व बॉक्सिंगसाठी व्हावी क्रीडा प्रबोधिनी, मुनगंटीवार यांची क्रीडा मंत्री यांना पत्राद्वारे मागणी

आढावा बैठकीत दुष्काळी स्थिती, पाणी टंचाई यावर चर्चा करण्यात आली. जिल्हाधिकारी, एसडीओ, तहसीलदार, गटविकास अधिकारी यांना सूचना देण्यात आल्या. चारा वैरण याची टंचाई भासणार नाही याची दक्षता घेण्याचे व तसे नियोजन करण्याचे निर्देश त्यांना दिले आहे.