नागपूर : ‘भारत जोडो’ यात्रेकरिता महिला काँग्रेसची बाईक रॅली

राहुल गांधी यांच्या ‘भारत जोडो’ यात्रेच्या वातावरण निर्मितीसाठी शहर महिला काँग्रेसच्या कार्यकर्त्यांनी बुधवारी संविधान चौक ते सेंट्रल ॲव्हेन्यूवरील महात्मा गांधी पुतळ्यापर्यंत दुचाकी मिरवणूक काढली.राहुल गांधी यांची भारत जोडो यात्रा विदर्भात १५ नोव्हेंबरला येत आहे. त्यासाठी संपूर्ण विदर्भात विविध उपक्रम राबवून जनजागृती करण्यात येत आहे. या यात्रेचा प्रचार केला जात आहे. संविधान चौकातील डॉ. बाबासाहेब आंबेडकर यांच्या प्रतिमेला माल्यार्पण करून शहर महिला काँग्रेसच्या अध्यक्षा नॅश अली यांच्या नेतृत्वाखाली ही बाईक रॅली निघाली. त्यानंतर सेंट्रल ॲव्हेन्यू येथील महात्मा गांधी यांच्या पुतळ्याला पुष्पहार घालून दुचाकी मिरवणुकीचा सांगता करण्यात आली.