गंगापूर रोड परिसरातील संत कबीर नगर येथे चर्चच्या समोर मित्रांसोबत जात असणाऱ्या २५ वर्षीय तरुणावर एका अज्ञात संशयिताने प्राणघातक हल्ला केल्याची घटना घडली. यावेळी हल्लेखोराने त्याच्याजवळील धारदार शस्त्राद्वारे तरूणाचा कान कापत त्याला ठार मारण्याचा प्रयत्न केला. या हल्ल्यात तरूण गंभीर जखमी झाला असून त्याच्यावर खासगी रुग्णालयात उपचार सुरू आहेत. या प्रकरणी अज्ञात संशयिताविरूध्द गंगापूर पोलीस ठाण्यात गुन्हा दाखल करण्यात आला आहे. सातपूरमधील गणेशनगर परिसरातील अमोल अपार्टमेंट येथे मिखिल कनवर हा मित्र अनिकेत पाटीलसह कामानिमित्त शहरात आला होता. मंगळवारी पहाटेच्या सुमारास मिखिल अनिकेतसह दुचाकीवरून सातपूरमधील आपल्या घराकडे जात होता. पहाटे पावणेतीनच्या सुमारास संत कबीरनगर परिसरात आले असता दहा ते पंधरा जणांच्या गर्दीतून एक अज्ञात युवक पुढे आला. त्याने मिखीलची गाडी अडवून त्याला बाजुला होण्यास सांगितले. कुठलाही वाद व पूर्ववैमनस्य नसताना त्या संशयित युवकाने अनिकेतच्या कानावर शस्त्राने वार केले. त्याला गंभीर जखमी करून संशयित घटना स्थळावरून पळून गेला. श्रीगुरूजी रुग्णालयात अनिकेतवर उपचार सुरू असून पोलीसांना या घटनेची माहिती मिळताच सहाय्यक पोलीस आयुक्त डॉ. राजू भुजबळ व त्यांच्या अन्य सहकाऱ्यांनी घटनास्थळी धाव घेतली. या अज्ञात संशयिताविरूध्द गंगापूर पोलीस ठाण्यात गुन्हा दाखल करण्यात आला आहे.
