येवल्यातील वीज उपकेंद्र आणि अशियाई विकास बँकेचा संबंध काय ? छगन भुजबळ यांनी काय सांगितले ?

भुजबळ यांच्या दौऱ्यात येवला शहरातील जुनी नगरपालिका इमारत सिटी येथे वाणिज्य संकुल बांधणे तसेच इतिहास संग्रहालय व अनुषंगिक कामे, येवल्यातील अंबीया शाह कॉलनी येथे शादिखाना पूरक बांधकाम, सुशोभीकरण व अनुषंगिक कामाचे भूमिपूजन करण्यात आले.  यावेळी प्रांताधिकारी बाबासाहेब गाढवे, तहसीलदार आबा महाजन, येवला नगरपालिकेचे मुख्याधिकारी तुषार आहेर, सार्वजनिक बांधकाम विभागाचे कार्यकारी अभियंता व्ही के आव्हाड, महावितरण विभागाचे अभियंता संजय तडवी आदी अधिकारी उपस्थित होते.

मंत्री छगन भुजबळ यांनी बल्हेगाव उपकेंद्रातून १०० ॲम्पियर क्षमतेचे दोन फिडर शेतीसाठी व बल्हेगाव-एजी, नागडे -एजी आणि बल्हाळेश्वर गावठाण असे तीन फिडर तयार झाल्याचे सांगितले. याचा फायदा बल्हेगाव, नागडे व धामणगाव येथील गावे, शिवार आणि वडगाव, कोटमगाव गावठाण परिसरातील घरगुती, वाणिज्यिक व शेती प्रवर्गातील ग्राहकांना विनाखंडित वीज पुरवठ्यात होणार आहे. महावितरणकडे आणखी नवीन वीज उपकेंद्र प्रस्तावित केलेले आहेत.

यात सोमठाण देश, पिंपळगाव जलाल, चिचोंडी  एमआयडीसी व जऊळकेसाठी प्रत्येकी पाच एमव्हीए क्षमतेच्या उपकेंद्रांचा समावेश आहे. सोमठाण देश व पिंपळगाव जलाल येथील वीज उपकेंद्रांसाठी अशियाई विकास बँकेकडून निधी उपलब्ध होणार आहे. सावरगाव येथे अतिरिक्त पाच एमव्हीए, कोटमगाव येथे पाच एमव्हीएचे रोहित्र बदलून तो १० एमव्हीए क्षमतेचा प्रस्तावित असल्याचे मंत्री छगन भुजबळ यांनी सांगितले.

सौर प्रकल्पाने दिवसाही वीज

सारोळे येथे अतिउच्च दाब उपकेंद्रास मंजूरी मिळाली असून त्याचे काम लवकरच सुरू होणार आहे.  पुढील महिन्यात अंगुलगाव येथील विद्युत उपकेंद्राचे लोकार्पण होत असून येवला शहर विद्युत उपकेंद्रातील पाच रोहित्राची क्षमता दुप्पट करण्याचे काम अंतिम टप्प्यात आहे. कोटमगाव येथील उपकेंद्रासाठी उंदीरवाडी येथे दोन मेगाव्हॉटचा सौर ऊर्जा प्रकल्प उभारला जात असून लवकरच तो कार्यान्वित होईल. यामुळे कोटमगाव उपकेंद्र अंतर्गत येणाऱ्या गावांना दिवसा शेती पंपासाठी वीज उपलब्ध होणार आहे. सत्येगाव येथे मुखेड उपकेंद्रांतर्गत नऊ मेगावॉट क्षमतेच्या सौर ऊर्जा प्रकल्पाचे काम प्रगतीपथावर आहे. या माध्यमातून मूलबक प्रमाणात वीज उपलब्ध होईल, अशी माहिती मंत्री छगन  भुजबळ यांनी दिली.