धुळे कोषागार कार्यालयातील कर्मचाऱ्यांच्या नावे लाच

धुळे पोलीस दलातून सहायक उपनिरीक्षक या पदावरून २०१९ मध्ये सेवानिवृत्त झालेल्या कर्मचाऱ्याने त्याची राहिलेली देयके मंजूर व्हावीत म्हणून १० जुलै रोजी पोलीस अधीक्षक कार्यालयात अर्ज केला होता. या रकमेपैकी एक लाख, २९ हजार ८८८ रुपयांचे देयक त्यांच्या बँक खात्यात जमा झाले होते. यानंतर त्यांनी उर्वरित देयकाची रक्कमही मिळावी म्हणून धुळे पोलीस अधीक्षक कार्यालयातील लेखा शाखेतील वरिष्ठ लिपीक सुनील गावित (४८) याची भेट घेतली. चौकशी केली असता दिलेल्या देयकाच्या मोबदल्यात आणि थकीत देयक वाढवून देण्याचे काम करून देण्यासाठी कोषागार कार्यालयातील कर्मचाऱ्यांच्या नावाने दोन हजार रुपयांची मागणी गावितने केली.

हेही वाचा : Nashik Crime : नाशिकमध्ये दुचाकीवर बसलेल्या तरुणाची हत्या, थरार सीसीटीव्हीत कैद

यासंदर्भात सेवानिवृत्त सहायक पोलीस उपनिरीक्षकाने दोन हजाराची मागणी केल्यासंदर्भात लाच लुचपत प्रतिबंधक विभागाच्या अधिकाऱ्यांकडे तक्रार केली. या अनुषंगाने लाचलुचपत प्रतिबंधक विभागातर्फे पोलीस अधीक्षक कार्यालयात सापळा रचण्यात आला. लाचेची रक्कम स्वीकारताच सुनील गावित यास लाचलुचपत प्रतिबंधक विभागाच्या पथकाने रंगेहात पकडले. गावितविरुद्ध धुळे शहर पोलीस ठाण्यात गुन्हा दाखल झाला आहे. सचिन साळुंखे, रूपाली खांडवी, राजन कदम, संतोष पावरा यांनी ही कारवाई केली.

हेही वाचा : कसारा घाटात रेल्वे मार्गावर दरड कोसळली, नाशिक-मुंबई वाहतूक सुरळीत

कोणताही शासकीय अधिकारी, कर्मचारी यांनी किंवा त्यांच्या वतीने कोणत्याही खासगी व्यक्तीने त्यांचे कोणतेही शासकीय काम करून देण्यासाठी, किंवा न करण्यासाठी अथवा ते काम करून दिल्याचे मोबदल्यात लाचेची मागणी केल्यास तत्काळ लाचलुचपत प्रतिबंधक विभाग,नाशिक येथे संपर्क करावा. असे आवाहन विभागाच्या अधिकाऱ्यांनी केले.