जळगाव : शहरातील सुवर्ण बाजारपेठेत धनत्रयोदशीपासून सोन्याचे दरात बऱ्यापैकी घट झाल्याने ग्राहकांना दिलासा मिळाला होता. मात्र, लक्ष्मीपुजनाच्या दिवशी सोन्याच्या दरात पुन्हा मोठी वाढ नोंदवली गेली. ग्राहकांना त्यामुळे दागिने खरेदी करताना थोडा हात आखडता घ्यावा लागला.
तज्ञांच्या म्हणण्यांनुसार, दिवाळीनंतर सोन्याच्या किमतीत थोडीशी घट होऊ शकते. सोन्याच्या किमतीत अलीकडील काळात होत असलेली वाढ आता थांबू शकते. कारण मोठ्या सणानंतर सोन्याची भौतिक मागणी कमी होण्याची अपेक्षा आहे. गुंतवणूकदार जागतिक आर्थिक संकेत आणि यूएस फेडरल रिझर्व्हच्या विधानांवर देखील लक्ष ठेवतील. सोन्यातील सध्याची तेजी आता स्थिर होऊ शकते.
या आठवड्याच्या मध्यापर्यंत भौतिक मागणी कमी होईल, ज्यामुळे किमतींमध्ये थोडीशी घसरण होण्याची शक्यता आहे. गुंतवणूकदार या आठवड्यात अनेक प्रमुख जागतिक डेटावर बारकाईने लक्ष ठेवतील. ज्यात चीनी आर्थिक डेटा, यूके चलनवाढ दर, विविध देशांमधील पीएमआय डेटा, यूएस ग्राहक विश्वास निर्देशांक आणि फेडरल रिझर्व्हच्या टिप्पण्यांचा समावेश आहे.
तशात लक्ष्मीपुजनाच्या दिवशीच सोन्याने मोठी झेप घेतली. दर कमी होण्याची आशा बाळगून असलेल्या ग्राहकांसह व्यावसायिकांना धक्का बसला. दरम्यान, सोन्याचे भाव अजुनही जास्त असले तरी दिवाळीत अनेक लोक सोने खरेदी करण्यासाठी गर्दी करताना दिसून येत आहेत. दिवाळीत मौल्यवान धातू खरेदी करणे हे शुभ मानले जाते.
यावर्षी सोन्याच्या किमती वाढल्यामुळे बरेच ग्राहक हलक्या वजनाचे दागिने किंवा नाणी निवडू शकतात, असा अंदाज व्यक्त केला गेला आहे. शनिवारी आणि सोमवारी किमतीत घसरण झाल्यामुळे ग्राहकांना काही प्रमाणात दिलासा मिळाला होता. मात्र, मंगळवारी पुन्हा सोन्याचे दर वधारल्याने ग्राहकांची निराशा झाली.
शहरात शनिवारी धनत्रयोदशीच्या दिवशी २७८१ रुपयांची घट झाल्याने २४ कॅरेट सोन्याचे दर प्रति १० ग्रॅमसाठी जीएसटीसह एक लाख ३२ हजार ३५५ रुपयांपर्यंत खाली आले होते. लक्ष्मीपूजनाआधी सोमवारी सकाळी पुन्हा बाजार उघडताच ७२१ रुपयांची घट नोंदवली गेली. त्यामुळे सोने एक लाख ३१ हजार ६३४ रुपयांपर्यंत खाली आले. परंतु, सोमवारी दिवसभरात आणखी ६१८ रुपयांची सुधारणा दरात झाल्याने सोन्याचे दर सायंकाळपर्यंत एक लाख ३२ हजार २५२ रुपयांवर स्थिरावले. मंगळवारी सकाळी बाजार उघडताच पुन्हा २१६३ रूपयांची वाढ नोंदवली गेली. त्यामुळे सोन्याचे दर एक लाख ३४ हजार ४१५ रूपयांपर्यंत पोहोचले.
चांदीचे दर मात्र स्थिर
जळगावमध्ये शनिवारी धनत्रयोदशीच्या दिवशी तब्बल ५१५० रुपयांची घट झाल्याने चांदीचे दर जीएसटीसह प्रति किलो एक लाख ७५ हजार रुपयांपर्यंत खाली आले होते. लक्ष्मीपूजनाआधी सोमवारी दिवसभरात पुन्हा ५१५० रुपयांची घट झाल्याने चांदी एक लाख ६९ हजार ९५० रूपयांपर्यंत खाली घसरली होती. लक्ष्मीपुजनाच्या दिवशी मंगळवारी मात्र कोणतीच वाढ अथवा घट नोंदवली गेली नाही. चांदीचे दर स्थिर राहिल्याने ग्राहकांना दिलासा मिळाला.
