जळगावमधील ‘त्या’ वादग्रस्त पोलीस निरीक्षकावर नैतिकता सोडल्याचा ठपका !

जळगावात जिल्हा नियोजन समितीच्या गेल्या शुक्रवारी आयोजित बैठकीदरम्यान चाळीसगावमधील आमदार मंगेश चव्हाण यांनी एका महिलेच्या बाबतीत लैंगिक शोषणाचा प्रकार घडल्याकडे लक्ष वेधले. पोलिसांत तक्रार केल्यास सदर महिलेला जीवे मारण्याच्या धमक्या दिल्या जात आहेत. तसेच आमदारांकडे तक्रार घेऊन गेल्यास त्यांनाही गोळ्या झाडण्याची धमकी संबंधित निरीक्षक देत असल्याचे त्यांनी सभागृहाच्या निदर्शनास आणून दिले. त्यासंदर्भात आपल्याकडे ध्वनीमुद्रीत पुरावे असल्याचेही त्यांनी सांगितले होते. त्याच दिवशी पीडित महिला जळगाव शहरातील औद्योगिक वसाहत पोलीस ठाण्यात संबंधित निरीक्षकाच्या विरोधात तक्रार देण्यासाठी पोहोचली होती.

आमदार चव्हाण यांनी केलेल्या खळबळजनक आरोपानंतर संबंधित पोलीस निरीक्षकाविरोधात गुन्हा दाखल होण्याची वेळ आली होती. परंतु, पीडित महिलेने ऐनवेळी विचार बदलल्याने गुन्हा दाखल झाला नाही. महिलेने कोणतीच तक्रार न केल्याने पोलीस निरीक्षकाचे स्थानिक गुन्हे शाखेचा पदभार काढण्यावर तेवढे निभावले.

पोलीस प्रशासनाची अब्रू वेशीवर टांगण्यास कारणीभूत ठरलेल्या संबंधित निरीक्षकाची तडकाफडकी उचलबांगडी करण्याची कार्यवाही तेवढी पोलीस अधीक्षकांनी केली. त्यामुळे आमदार चव्हाण यांचे आरोप हवेत विरल्याची टीका झाली. याअनुषंगाने चव्हाण यांनी मंगळवारी पोलीस अधीक्षक डॉ. महेश्वर रेड्डी यांची भेट घेत महिलेचा लैंगिक छळ केल्याचा आरोप असलेल्या स्थानिक गुन्हे शाखेच्या त्या निरीक्षकाला निलंबित करून खातेनिहाय चौकशी करण्याची मागणी केली.

पीडित महिलेने निरीक्षकाच्या विरोधात पोलिसात तक्रार केली नसली तरी माझ्यासाठी तो विषय संपलेला नाही. त्यासंदर्भात सर्व पुरावे आपल्याकडे असल्याने गरज पडल्यास स्वतः पोलीस निरीक्षकाविरोधात तक्रार करणार असल्याचे त्यांनी पत्रकारांशी बोलताना सांगितले.

महिला ज्या पोलीस ठाण्यात तक्रार करण्यास गेली होती, त्याच पोलीस ठाण्याचा प्रभारी संबंधित निरीक्षक एकेकाळी होता. त्यामुळे कदाचित महिलेची तक्रार दाखल करून घेण्यात वेळकाढू करण्यात आला असेल. त्या महिलेवर अत्याचार झाला आहे. भले ती आता बाजुला झाली असेल, पण तिने केलेली लेखी तक्रार अजुनही पोलीस ठाण्यात आहे. एखादा पोलीस निरीक्षक आमदाराला गोळी मारण्याची धमकी देत आहे आणि ते महिलेच्या तक्रारीत नमूद केले आहे. त्यामुळे त्या वादग्रस्त निरीक्षकाला निलंबित करावे लागेल. आपल्याकडे असलेले काही पुरावे गरज पडल्यास आपण जनतेसमोर आणू, असेही आमदार मंगेश चव्हाण यांनी म्हटले आहे.

दरम्यान, पोलीस अधीक्षक डॉ. महेश्वर रेड्डी यांनी उपविभागीय अधिकाऱ्यांकडून अहवाल प्राप्त होताच गुन्हे शाखेच्या संबंधित निरीक्षकावर नैतिकतेला सोडून कृत्य केल्याचा ठपका ठेवला आहे. पुढील कारवाईच्या अनुषंगाने त्यासंदर्भात विशेष पोलीस महासंचालकांकडे पत्र व्यवहार केला आहे.