नाशिक – शहरातील राजकीय गुन्हेगारांविरोधात कठोर पावले उचलणाऱ्या नाशिक पोलिसांना आता महानगरपालिकेची साथ मिळाली आहे. उत्तर प्रदेशच्या धर्तीवर गुन्हेगारी टोळ्यांच्या अनधिकृत मालमत्तेवर बुलडोझर कारवाईचा मार्ग अनुसरण्यात आला आहे. गोळीबार प्रकरणात अटकेत असणारा रिपाइंचा पदाधिकारी, माजी नगरसेवक प्रकाश लोंढे टोळीचा कारभार ज्या इमारतीतून चालतो, ती अनधिकृत इमारत गुरुवारी सकाळपासून कडेकोट पोलीस बंदोबस्तात जमीनदोस्त करण्यास सुरुवात करण्यात आली.
शहरातील गुन्हेगारांना केवळ अटक न करता आता त्यांच्या अनधिकृत मालमत्तेवर कारवाई करण्यासाठी पोलीस आणि महापालिका प्रशासन सज्ज झाल्याचे अधोरखीत झाले. यामुळे गुन्हेगारांना मोठा दणका बसणार असून त्यांच्या आर्थिक नाड्या आवळण्यासाठी प्रयत्न केले जात आहेत. प्रकाश लोंढे अर्थात पीएल ग्रुपची आयटीआय सिग्नल-खुटवडनगर मार्गावर ही इमारत आहे. आदल्या दिवशी मनपाच्या पथकाने पीएल ग्रुपचा दबदबा दर्शविणारे इमारतीसह आसपासचे सर्व फलक, कठडे हटविले होते.
गुरुवारी भल्या सकाळी मनपाच्या अतिरिक्त आयुक्त स्मिता झगडे यांच्या उपस्थितीत पथकाने इमारत जमीनदोस्त करण्यात सुरूवात केली. कुठलाही अनुचित प्रकार घडू नये म्हणून यावेळी मोठा पोलीस बंदोबस्त तैनात करण्यात आला. मुख्य मार्गावरील एका बाजुची वाहतूक बंद करून ती दुसऱ्या बाजुने वळवण्यात आली. इमारतीलगतची घरे आधीच रिकामी करण्यात आली होती.
सातपूर गोळीबार प्रकरणातील मुख्य संशयित भूषण लोंढे फरार आहे. पोलिसांनी त्याचे वडील आणि रिपब्लिकन पार्टी ऑफ इंडियाचा पदाधिकारी प्रकाश लोंढे, भूषणचा भाऊ दीपक लोंढे यांना सहआरोपी करत ताब्यात घेतले. संशयितांच्या पोलीस कोठडीत न्यायालयाने १७ ऑक्टोबरपर्यंत वाढ केली. यामध्ये प्रकाश लोंढे, दीपक लोंढे, संतोष पवार, अमोल पगारे, देवेश शिरताटे, शुभम गोसावी यांचा समावेश आहे. या गुन्ह्यात फरार असलेल्या सनी विठ्ठलकर याला स्थानिक गुन्हे शाखेने अटक केली.
लोंढे यांच्याशी संबंधित ही इमारत निळ्या पूररेषेत बांधलेली होती. या संदर्भात महापालिकेने कागदपत्रे सादर करण्याची नोटीस बजावली. विहित मुदतीत लोंढे वा त्यांच्यावतीने कुणीही कागदपत्रे सादर करण्यास पुढे आले नाही. नोटीसचा कालावधी संपल्यानंतर पथकाने अनधिकृत इमारतीवर पोकलँड यंत्राद्वारे हातोडा टाकला. दिवसभरात इमारत जमीनदोस्त करण्याचे काम पूर्ण होण्याचा अंदाज आहे. या पाडकामाचा खर्च संबंधितांकडून वसूल केला जाणार आहे.
