जळगाव : दिवाळी आणि छठ पूजा सणांच्या निमित्ताने प्रवाशांची वाढती मागणी आणि अतिरिक्त गर्दी लक्षात घेता मध्य रेल्वेकडून विशेष गाड्या चालवल्या जाणार आहेत. पुणे जाणाऱ्या प्रवाशांसाठी सोयीच्या ठरणार्‍या काही रेल्वे गाड्यांना यापूर्वीच जळगाव आणि भुसावळ स्थानकांवर थांबा देण्यात आला आहे. त्यानंतर आणखी तीन गाड्यांना दोन्ही स्थानकांवर थांबा मिळाला आहे.
जळगाव जिल्ह्यातून हजारो प्रवासी पुणे येथे नोकरी, व्यवसाय तसेच शिक्षणानिमित्त ये-जा करतात. विशेषतः दिवाळीला एसटी तसेच खासगी निमआराम बसेस आणि रेल्वे गाड्यांमध्ये मोठी गर्दी होत असते. या पार्श्वभूमीवर, जळगाव-भुसावळमार्गे काही विशेष गाड्या सुरू करण्याचा निर्णय मध्य रेल्वेच्या प्रशासनाने घेतला आहे. गर्दीच्या हंगामात प्रवाशांना त्यामुळे बऱ्यापैकी दिलासा मिळण्याची शक्यता व्यक्त होत आहे. लांब पल्ल्याच्या गाड्या कायम फुल्ल असतात. त्यात बऱ्याच वेळा जळगाव आणि भुसावळच्या प्रवाशांना जागा मिळत नाही.
पुणे-दानापुर-पुणे
या विशेष गाडीच्या दोन्ही बाजुने एकूण ४० फेऱ्या होतील. ०१४८१ विशेष रेल्वे गाडी २६ सप्टेंबर ते एक डिसेंबर या कालावधीत प्रत्येक सोमवारी तसेच शुक्रवारी पुणे येथून ०७.५५ वाजता सुटेल आणि तिसऱ्या दिवशी १०.०० वाजता दानापुर पोहोचेल. ०१४८२ विशेष गाडी २८ सप्टेंबर ते तीन डिसेंबर या कालावधीत प्रत्येक बुधवारी आणि रविवारी दानापुर येथून १२.३० वाजता सुटेल आणि दुसऱ्या दिवशी रात्री ११.५५ वाजता पुणे येथे पोहोचेल. या गाडीला जळगाव आणि भुसावळला थांबा मंजूर आहे.
पुणे-गाजीपुर सिटी-पुणे
या विशेष रेल्वे गाडीच्या दोन्ही बाजुने एकूण ३८ फेऱ्या होतील. ०१४३१ विशेष गाडी २६ सप्टेंबर ते २८ नोव्हेंबर या कालावधीत प्रत्येक शुक्रवारी आणि मंगळवारी पुणे येथून ०६.४० वाजता सुटेल आणि दुसऱ्या दिवशी ०७.४० वाजता गाजीपुर सिटी स्थानकावर पोहोचेल. ०१४३२ विशेष गाडी २७ सप्टेंबर ते २९ नोव्हेंबर या कालाधीत प्रत्येक शनिवारी आणि बुधवारी गाजीपुर सिटीवरून रात्री १०.४० वाजता सुटेल आणि तिसऱ्या दिवशी दुपारी ०४.२० वाजता पुणे येथे पोहोचेल. या गाडीला देखील जळगाव, भुसावळ स्थानकांवर थांबा मंजूर आहे.
नागपूर-हडपसर-नागपूर
या विशेष रेल्वे गाडीच्या दोन्ही बाजुने एकूण ३६ फेऱ्या होतील. ०१२०१ विशेष गाडी २९ सप्टेंबर ते २७ नोव्हेंबर या कालावधीत प्रत्येक सोमवारी आणि गुरूवारी नागपूर येथून रात्री ०७.४० वाजता सुटेल आणि दुसऱ्या दिवशी दुपारी ११.२५ वाजता हडपसर येथे पोहोचेल. ०१२०२ विशेष गाडी ३० सप्टेंबर ते २८ नोव्हेंबर या कालावधीत प्रत्येक मंगळवारी आणि शुक्रवारी हडपसर येथून दुपारी ०३.५० वाजता सुटेल आणि दुसऱ्या दिवशी ०६.३० वाजता नागपूर येथे पोहोचेल. ही गाडी सुद्धा जळगाव, भुसावळ स्थानकांवर थांबेल.
