संत निवृत्तीनाथ पालखीचे उत्साहात स्वागत

त्र्यंबकेश्वरहून दोन दिवसांपूर्वी निघालेली श्री संतश्रेष्ठ निवृत्तीनाथ महाराज यांची पालखी गुरुवारी नाशिकमध्ये पोहचली. नाशिक पंचायत समितीजवळ पालखी आल्यावर विभागीय आयुक्त डॉ. प्रवीण गेडाम, महानगर पालिका आयुक्त तथा प्रशासक मनिषा खत्री यांनी स्वागत केले. रामकृष्ण हरी, जयहरी विठ्ठल माऊलीच्या गजरात जिल्हाधिकारी जलज शर्मा आणि आयुक्त मनिषा खत्री यांनी टाळ वाजवत वारीत काहीवेळ सहभागही घेतला. वारीत महानगर पालिकेच्या अतिरिक्त आयुक्त प्रदीप चौधरी, उपआयुक्त लक्ष्मीकांत साताळकर, नितीन पवार, शहर अभियंता संजय अग्रवाल, कार्यकारी अभियंता सचिन जाधव आदी अधिकारी सहभागी झाले. प्रशासनाकडून करण्यात आलेल्या स्वागतामुळे वारकरी भारावून गेले.

दरम्यान, वारी मार्गावर ठिकठिकाणी सामाजिक संस्था, स्वयंसेवकांकडून वारीचे स्वागत होत आहे. वारी मुक्कामात वारकऱ्यांची नियमितपणे आरोग्य तपासणी करण्यात येत आहे. वारीबरोबर दोन रुग्णवाहिका आहेत. वारीमुळे शहरातील काही रस्त्यावरील वाहतूक मार्गात बदल करण्यात आला आहे. गुरूवारी पालखीचा मुक्काम जुने नाशिक येथील काझीपुरा विठ्ठल मंदिरात झाला.

खड्ड्यांमुळे नाराजी वारी मार्गावरील खड्ड्यांची तात्पुरती डागडुजी करण्यात आल्याने देवस्थानचे माजी विश्वस्त पुंडलिक थेटे यांनी नाराजी व्यक्त केली. तात्पुरत्या डागडुजीमुळे पावसाचा हलका शिडकावा आला किंवा अवजड वाहने गेली की खड्डे उघडे होतात. हे खड्डे वारकऱ्यांसह वारीतील अश्व, बैल यांच्या पायालाही त्रासदायक आहेत. यामुळे जखमा होण्याची शक्यता आहे. याबाबत प्रशासनाने कायमस्वरूपी उपाययोजना करण्याची मागणी वारकऱ्यांकडून होत आहे.