“नाशिकमध्ये शिवसेना गटबाजीपासून दूर”, दादा भुसे यांचा दावा

भुसे नाशिक दौऱ्यावर असतांना त्यांनी पत्रकारांशी संवाद साधला. शिंदे गटात सारे काही आलबेल असल्याचे त्यांनी सांगितले. जिल्ह्याच्या पालकमंत्रीपदी अद्याप कोणाची निवड झालेली नसली तरी जिल्ह्यातील कामे त्यामुळे अडलेली नाहीत. लोकप्रतिनिधी, जिल्हाधिकारी आणि सचिव यांच्या माध्यमातून कामे केली जात आहेत. कुठलेही काम थांबलेले नाही. लोकप्रतिनिधी आपल्या कामाच्या याद्या जिल्हाधिकारी यांच्याकडे देत आहेत. जिल्हाधिकारी संबंधित समितीच्या सचिवांकडे त्या देतात. निकषानुसार विकास कामे मार्गी लागत आहेत, असे भुसे यांनी नमूद केले.

पहलगाम हल्ल्यानंतर पंतप्रधानांनी पाकिस्तानला चोख उत्तर दिले. लष्करी तळासह, दहशतवाद्यांचे अड्डे उदध्वस्त करण्यात आले. भारतीय सैन्यदलाने शौर्य गाजवले. यासाठी ठिकठिकाणी तिरंगा यात्रा निघत आहेत. परंतु, त्याकडे काही पक्ष राजकीय भूमिकेतून बघत आहेत. याप्रश्नी कोणी उठसूठ राजकारण करू नये, असा टोला भुसे यांनी ठाकरे गटाला हाणला.