अ‍ॅपद्वारे गाडी भाड्याने देत आहात? सावधान!

रमेश राजपूत आणि झुमकार अ‍ॅपचे संचालक यांच्या विरोधात गुन्हा नोंद करण्यात आला आहे. यातील फिर्यादी मानसी द्विवेदी या उलवे येथे राहत असून त्यांनी आपल्या गाडीची नोंदणी झुमकार या अ‍ॅपवर केली आहे. ज्यांना भाड्याने गाडी हवी आहे असे ग्राहक याच अ‍ॅपद्वारे ओळखपत्र आणि करारपत्र करून गाडी भाड्याने घेऊ शकतात. अशाच प्रकारे मानसी यांची गाडी १४ जुलैला रमेश राजपूत यांनी बुक केली. मात्र ठरलेल्या दिवशी त्यांनी गाडी परत केलीच नाही. या बाबत राजपूत यांना विचारणा केली असता राजपूत  यांनाही झुमकार वर आपल्या गाडीची नोंद केली होती. मात्र गाडीचे नुकसान झाले हे नुकसान झुमकार भरून देत नाही. त्यामुळे  प्रकरण जो पर्यंत संपत नाही तो पर्यंत गाडी देणार नाही असे मानसी यांना सांगण्यात आले. 

आणखी वाचा-नवी मुंबई: पोलीस ठाणे पार्किंगमध्ये हत्ती? वाचा काय आहे प्रकार

दरम्यान मानसी या आपल्या कुटुंबियांसमवेत देवदर्शनासाठी बाहेरगावी गेल्या होत्या. परत आल्यावर त्यांनी याबाबत झुमकार अ‍ॅपशी संपर्क साधल्यावर त्यांनीही राजपूत यांनी दिलेल्या माहितीला दुजोरा दिला. तसेच लवकरात लवकर गाडी मिळवून देतो असे सांगितले मात्र आजतागायत गाडी न मिळाल्याने अखेर मानसी यांनी एनआरआय पोलीस ठाण्यात राजपूत आणि झुमकार अ‍ॅपविरोधात शुक्रवारी गुन्हा नोंद केला.