पनवेल अनंत चतुर्दशीच्या दिवशी बाप्पाच्या विसर्जन मिरवणूकीत नवी मुंबईसह पनवेल उरण तालुक्यांमधील महामार्गावर अवजड वाहतूकीस आज (शुक्रवारी) पहाटे ६ वाजल्यापासून मालाची वाहतूक करणा-या वाहनांना प्रवास बंदीचे आदेश नवी मुंबईच्या वाहतूक विभागाचे पोलीस उपायुक्त पुरुषोत्तम कराड यांनी काढले आहेत. यानूसार ठाणे जिल्ह्यातून रायगड जिल्ह्यात विशेषता जेएनपीटी बंदरात जाणा-या अवजड वाहनांना ब्रेक लागणार आहे. तसेच मुंबई व ठाणे भिवंडी येथून पनवेल व रायगडमध्ये जाण्यासाठी वापरला जाणारा शिळफाटा ते पनवेल आणि उरण या मार्गांवर वाहतूकीस बंदी घालण्यात आली आहे. विसर्जन मिरवणूकांना अडथळा न होण्यासाठी ही बंदी ठेवण्यात आली असून या प्रवास बंदीसोबत रस्त्यावर वाहने उभी करण्यास बंदी घातली आहे.
हेही वाचा >>> उरण : बोंबील गडगडले ; आवक वाढली मात्र दर घटले
शुक्रवारी दिवसा अवजड वाहनांना बंदी असल्याने गुरुवारी रात्री मोठ्या प्रमाणात मालाची वाहतूक करणारी अवजड वाहने रस्त्यावर धावत होती. मोटार परिवहन कायद्याचे २( १६ ) अन्वये गणेशोत्सव काळात विसर्जन मिरवणूकीत अडथळा टाळण्यासाठी नवी मुंबई व ठाणे पोलीस आयुक्तालयाच्या हद्दीतून जाणा-या जड व अवजड वाहनांना नवी मुंबईच्या सर्वच मार्गांवर प्रवास करण्यासह रस्त्यावर उभी करण्याचे बंदी आदेश पोलीस उपायुक्त कराड यांनी पोलीसांना दिले आहेत. ही बंदी शुक्रवारी रात्री दहा वाजेपर्यंत असणार असून शनिवारी पहाटे सहा वाजेपर्यंत पुन्हा अवजड वाहने रस्त्यावर प्रवास करु शकणार आहेत.
