पनवेल परिसरामध्ये घरफोडीचे सत्र सुरूच…

पनवेल शहरात घडलेल्या दोन वेगवेगळ्या चोरीच्या घटनांमुळे नागरिकांमध्ये भीतीचे वातावरण आहे. मंगळवारी दुपारी बारा वाजता जुन्या पोस्टाजवळील श्री स्वामी समर्थ सोसायटीमध्ये १०१ क्रमांकाच्या सदनिकेत चोरटे शिरून त्यांनी तब्बल १५ लाख ९५ हजारांचा मुद्देमाल चोरला. पनवेल शहरातील टिळक रस्त्यावरील मॅस्ट्रो वास्तू दुकानातून ६ नोव्हेंबरला दुकानदाराने दुकान बंद केल्यावर रात्रीच्या वेळी दुकानाच्या छताचे पत्रे तोडून दुकानातील नवरत्न स्टोन आणि रोख रक्कम असा १ लाख ६५ हजार रुपयांचा मुद्देमाल चोरला.

दुकानाचे पत्रे तोडेपर्यंत पोलीस कुठे होते, असा प्रश्न व्यापारी वर्गाकडून विचारला जात आहे. अशीच स्थिती खांदेश्वर वसाहतीची आहे. ८ ऑक्टोबरला मध्यरात्री सेक्टर १५ येथील प्रजापती आर्केड या इमारतीमधील गाळा क्रमांक १० मधील हॉटेलचे शटर तोडून ७० हजार रुपयांची चोरी केली.

खारघर उपनगरातील एका चोरीच्या घटनेमुळे सध्या खारघरवासीयांच्या चिंतेत वाढ झाली आहे. ४ ऑक्टोबरच्या मध्यरात्री सेक्टर ३५ या रेझा ग्रॅन्ड ओव्हर या इमारतीची सुरक्षा यंत्रणा चांगली आहे. मात्र या इमारतीच्या मागील मोकळ्या जागेवरून प्रवेश करत, चार चोरटे इमारतीमधील वाहनतळात शिरले.

पहाटे चार वाजता सुरक्षारक्षक झोपले असताना चोरांनी सोसायटीतील तिसऱ्या मजल्यावरील सदनिकेत प्रवेश केला. या घरातील गृहिणी आणि त्यांच्या दोन मुली झोपल्या असताना घरात काहीतरी हालचाल झाल्याचे या महिलेच्या ध्यानात आले. चोरटे त्यांच्या घरात खिडकीवाटे शिरल्याचे बाहेर पडताना पाहिले. यानंतर सीसीटीव्ही चित्रीकरण तपासल्यावर चोरट्यांनी वाहनतळात शिरल्यानंतर शिडीवाटे तिसऱ्या मजल्यावरील घरात प्रवेश करून मोबाइल व पन्नास हजार चोरले.

अतिरिक्त पोलीस नियाेजनानंतरही चोरीत वाढ

नवी मुंबई पोलीस आयुक्त मिलिंद भारंबे यांनी परिमंडळाची रचना नव्याने केल्यामुळे दोन ऐवजी तीन पोलीस उपायुक्तांच्या देखरेखीखाली नवी मुंबई परिसर आला. तसेच पनवेल परिसराला दोन साहाय्यक पोलीस आयुक्त मिळाल्याने पोलीस विभागाचा कारभार अजून काटेकोर पद्धतीने आणि सखोल होईल अशी अपेक्षा होती. मात्र पोलिसांच्या नियोजनानंतरही चोरीचे सत्र पनवेलमध्ये सुरूच आहे.