यंदा गौरी-गणपती बैलगाडीवर आरूढ ; पेणच्या बाजारात अधिक मागणी

पेण हे गणपती मूर्तिकारांचे जागतिक माहेरघर मानले जात असून तालुक्यात सुमारे एक हजारपेक्षा अधिक गणपती कारखाने आहेत. एक फुटापासून १० ते १२ फुटांच्या मूर्ती येथे घडवल्या जातात.
विविध रूपांतील आकर्षक मूर्ती येथील कारखानदार बनवत असल्याने परदेशांतूनही येथील मूर्तींना मागणी असते. गेली दोन वर्षे निर्बंधांमुळे मूर्तिकारांसमोर अनेक अडचणी निर्माण झाल्या होत्या. मात्र आता निर्बंध शिथिल झाल्याने लहान आकाराच्या मूर्तींपासून मोठ्या आकाराच्या मूर्तींनाही मागणी असल्याने मूर्तिकारांना दिलासा मिळाला आहे.

पेण तालुक्यातील तांबडशेत येथील कारखानदार वैभव ठाकूर यांनी सांगितले की, नुकतीच बैलगाडी शर्यतींवरील बंदी उठविल्यामुळे यंदा बैलगाडीवर विराजमान गणपती आणि गौरीच्या मूर्तींना विशेष मागणी आहे. यामध्ये डोंबिवली येथील बैलगाडी शर्यतप्रेमी यांच्यासह ओडिशा, रायपूर, कर्नाटक, हैदराबाद, कोल्हापूर येथून अशा मूर्तींना मागणी आहे. आतापर्यंत २० मूर्तींची नोंदणी झाली आहे.
सुबक व आकर्षक मूर्ती

सुमारे अडीच ते तीन फूट लांबीची बैलगाडी तयार करण्यात येत असून पैठणी साडी, शाही फेटा, नथ आणि सोन्याचे दागिने घातलेली गौरीची लोभस मूर्ती तयार करण्यात येत आहेत. तसेच हिरेजडित दागिने आणि पेशवाई फेटा घातलेल्या गणपतीची सुबक आकर्षक मूर्ती या बैलगाडीवर आरूढ असणार आहे.