उरण विधानसभेची तिरंगी लढत निश्चित, भाजपा, शिवसेना, शेकाप यांच्यात चुरस

ही विधानसभा निवडणुकही २०१९ प्रमाणेच भाजपा, शिवसेना(ठाकरे) व शेतकरी कामगार पक्ष यांच्यात तिरंगी होत आहे. त्यामुळे या निवडणुकीतही भाजपा, शिवसेना (उद्धव ठाकरे) व शेकाप यांच्यात चुरशीच्या लढतीचे चित्र आहे. उरण मतदारसंघात एकूण ३ लाख ३६ हजार २२० मतदार आहेत. यामध्ये १ लाख ६८ हजार ७११ पुरुष तर १ लाख ६७ हजार ४०७ महिला मतदारांची नोंद झाली आहे. २०१९ च्या निवडणुकीनंतर शिवसेनेत विभाजन झाले. तर शेकापही खिळखिळा झाला होता. मात्र लोकसभा निवडणुकीत शेकाप व शिवसेना (उद्धव ठाकरे), काँग्रेस आणि इतर पक्षांनी एकत्र येत उरण विधानसभा मतदारसंघात महाविकास आघाडीला मताधिक्य मिळविले होते. त्यामुळे महाविकास विरोधात महायुती अशी थेट लढत होण्याची अपेक्षा मतदारांना होती. उरणमध्ये महाविकास आघाडीतील रस्सीखेचीमुळे ही निवडणूक तिरंगी होणार आहे. सध्या उरण विधानसभा निवडणुकीसाठी भाजप,शिवसेना (उद्धव ठाकरे) व शेतकरी कामगार पक्ष या तीन प्रमुख पक्षांनी प्रचार सुरू केला आहे. इच्छुक उमेदवार आणि त्यांचे कार्यकर्ते एकमेकांवर आरोप-प्रत्यारोप करू लागले आहेत. काहींनी तर मतदान केंद्रनिहाय आपली तयारीही पूर्ण केली आहे. त्यासाठी कार्यकर्त्यांनी कंबर कसली आहे. उरण विधानसभा निवडणुकीत विद्यमान आ. महेश बालदी हे भाजपकडून, माजी आ. मनोहर भोईर शिवसेना ठाकरे गटाकडून तर प्रीतम म्हात्रे यांनी शेतकरी कामगार पक्षाकडून उमेदवारी मिळवली आहे. यातील महेश बालदी हे भाजपाला पाठिंबा देणारे अपक्ष आमदार आहेत. मात्र या निवडणुकीत त्यांना भाजपाकडून उमेदवारी जाहीर झाली आहे. त्याचा प्रचारही सुरू झाला आहे. यावेळी उरणमध्ये कमळ फुलणार असा दावा करण्यात येत आहे. महाविकास आघाडीच्या वतीने ठाकरे गटाकडून माजी आ. मनोहर भोईर यांनी या निवडणुकीत आपण लढणार आणि जिंकणार असा दावा केला आहे. दुसरीकडे शेतकरी कामगार पक्षाने प्रीतम म्हात्रे यांनी महाविकास आघाडीच्या निर्णयाच्या विरोधात जाऊन आपला उमेदवारी अर्ज कायम ठेवण्यात आला आहे. त्यांनीही लढाऊ व संघर्षरत शेतकरी कामगार पक्षांच्या कार्यकर्त्यांच्या ऐकीवर लढणार आणि जिंकणारच असा दावा उमेदवारी कायम ठेवल्या नंतर केला आहे.

हेही वाचा :बेलापूरमध्ये काँग्रेस, राष्ट्रवादीत बंड; अनिल कौशिक, राजू शिंदे यांचा भाजप प्रवेश

शिट्टीची चर्चा : प्रीतम म्हात्रे यांनी महाविकास आघाडीत बंडखोरी करीत निवडणूक लढविण्याचा निर्णय घेतला आहे. त्यांना शिट्टी हे निवडणूक चिन्ह मिळाले आहे. त्यामुळे या चिन्हाची चर्चा सुरू आहे. कारण महायुतीत बंडखोरी करीत विद्यमान आमदार महेश बालदी यांनीही २०१९ मध्ये शिट्टी चिन्ह घेत निवडणूक जिंकली होती.