scorecardresearch

Premium

रावसाहेब दानवेंविरुद्ध सक्षम उमेदवाराचा महाविकास आघाडीत शोध

सलग पाच निवडणुकीतील पराभवामुळे काँग्रेस पक्षातील जनमानसातील प्रतिमा पराभूत होणारा पक्ष अशीच झालेली आहे. दानवेंच्या विरुद्ध सक्षम उमेदवाराचा शोध त्या पक्षात चालू आहे.

jalna lok sabha constituency, Mahavikas Aghadi, candidate, Raosaheb Danve
रावसाहेब दानवेंविरुद्ध सक्षम उमेदवाराचा महाविकास आघाडीत शोध ( Image – लोकसत्ता ग्राफिक्स टीम )

लक्ष्मण राऊत

जालना : सलग पाच वेळा जालना लोकसभा मतदारसंघातून विजयी होणारे भारतीय जनता पार्टीचे नेते व केंद्रीय राज्यमंत्री रावसाहेब दानवे यांना आव्हान देऊ शकेल अशा सक्षम उमेदवाराची महाविकास आघाडीकडे वानवा आहे. यातूनच सक्षम उमेदवाराचा शोध सुरू झाला आहे. १९९६ आणि १९९८ मध्ये झालेल्या निवडणुकीत उत्तमसिंग पवार आणि त्यानंतरच्या सलग पाच निवडणुकांत रावसाहेब दानवे या मतदारसंघातून निवडून आलेले आहेत. १९९९ पासून काँग्रेस उमेदवारांचा पराभव झालेला आहे.

Congress in huge financial crisis,
काँग्रेस प्रचंड आर्थिक चणचणीत; प्राप्तिकर लवादासमोर पक्षाच्या वतीने युक्तिवाद
Ambadas danave and vijay wadettiwar
“राज्यातील दोन्ही विरोधी पक्षनेते महायुतीत सामील होतील”, काँग्रेसमधून भाजपात गेलेल्या नेत्याचा मोठा दावा
gadchiroli bjp marathi news, bjp leaders, lok sabha ticket
गडचिरोली लोकसभा उमेदवारीवरून भाजपमध्ये अंतर्गत कुरघोड्या; आमदारांपाठोपाठ माजी मंत्र्याच्या भावाचाही दावा
News About Sonia gandhi, All Know about it
काँग्रेसची अवस्था शरपंजरी झालेल्या भीष्माचार्यांसारखी का झाली?

रावसाहेब दानवे निवडणुकीच्य राजकारणात वाकबगार मानले जातात. १९९९ मध्ये पहिल्यांदा लोकसभा सदस्यपदी निवडून येण्यापूर्वी दोन वेळेस ते भोकरदन विधानसभा मतदारसंघातून निवडून आले होते. भाजपासोबतच विरोधी पक्षांतील अनेक लहान-मोठ्या नेत्यांशी त्यातही काँग्रेसमधील पुढाऱ्यांशी त्यांचे सलोख्याचे संबंध आहेत. गेल्या निवडणुकीपर्यंत शिवसेना त्यांच्यासोबत होती. या वेळेस शिवसेना (उद्धव ठाकरे) त्यांच्यासोबत असणार नाही. या नवीन राजकीय समीकरणाने भाजप म्हणजेच रावसाहेब दानवे यांची मते किती कमी होतील याची चर्चा राजकीय कार्यकर्त्यांत आहे. विशेष म्हणजे भाजपमध्येही ही चर्चेचा विषय आहे.

हेही वाचा… पुणे काँग्रेसमध्ये सारे काही शांत शांत…

सलग पाच निवडणुकीतील पराभवामुळे काँग्रेस पक्षातील जनमानसातील प्रतिमा पराभूत होणारा पक्ष अशीच झालेली आहे. दानवेंच्या विरुद्ध सक्षम उमेदवाराचा शोध त्या पक्षात चालू आहे. मागील पाच निवडणुकांत सर्वाधिक चुरशीची लढत दानवे आणि काँग्रेसचे कल्याण काळे यांच्यात झाली होती. त्यावेळी काळे फार कमी फरकाने म्हणजे एक हजार ८३८ मतांनी पराभूत झाले होते. आगामी निवडणुकीसाठी काँग्रेसकडून पुन्हा एकदा त्यांच्या नावाची चर्चा आहे. जालना शहर काँग्रेस अध्यक्ष शेख महेमूद यांनी या संदर्भात सांगितले की, गेल्या पाच निवडणुकांत काँग्रेसचा पराभव झालेला असला तरी यापैकी अनेक निवडणुकांत काँग्रेसचे उमेदवार फार कमी मतांनी पराभूत झालेले आहेत. १९९८ आणि २००९ मध्ये काँग्रेस उमेदवार अल्प मतांनी पराभूत झाले होते. तर १९९९ मध्ये काँग्रेस, राष्ट्रवादी आणि भाजप अशी तिरंगी लढत असल्याने त्याचा फायदा भाजपला झाला होता.

हेही वाचा… मंत्र्यांच्या साक्षीवर शिंदे गटाची मदार, अधिवेशन काळातही सुनावणी

आगामी निवडणुकीसाठी कल्याण काळे, पक्षाचे जिल्हाध्यक्ष राजाभाऊ देशमुख यांच्यासह अन्य काही नावेही उमेदवारीकरिता चर्चेत आहेत. काँग्रेस पक्ष सलग पराभूत होत असल्याने महाविकास आघाडीकडून शिवसेनेचा (उद्धव ठाकरे) उमेदवार उभा करावा म्हणजे तो भाजपला समर्थ टक्कर देऊ शकेल असा सूर त्या पक्षातून उमटत आहे. विधान परिषदेतील विरोधी पक्षनेते अंबादास दानवे, माजी आमदार शिवाजीराव चोथे यांच्यासह काही नावे यासाठी कार्यकर्त्यांच्या पातळीवरील चर्चेत आहेत. शिवसेनेचे जिल्हाप्रमुख भास्कर अंबेकर यांनी या संदर्भात ‘लोकसत्ता’स सांगितले की, या लोकसभा मतदारसंघात जालना आणि छत्रपती संभाजीनगर जिल्ह्यांतील प्रत्येकी तीन विधानसभा मतदारसंघ समाविष्ट आहेत. त्यामुळे दोन्ही जिल्ह्यांतील पदाधिकारी आणि कार्यकर्त्यांचे मत उमेदवारीसाठी आवश्यक असते. महाविकासा आघाडीत ही जागा सोडवून घ्यावी अशी मागणी आम्ही पक्षश्रेष्ठींकडे केलेली आहे. आमच्या पक्षास जागा सुटली तर उमेदवारीचा निर्णय पक्षश्रेष्ठी घेतील.

हेही वाचा… मावळमध्ये अजितदादा पुत्र पार्थ पवारांसाठी जुळवाजुळव?

१९९९ मध्ये झालेल्या तिरंगी लढतीत राष्ट्रवादी आणि काँग्रेसचे उमेदवार स्वतंत्रपणे उभे होते. त्या वेळेस या दोन्ही पक्षांचा पराभव करून भाजपचे रावसाहेब दानवे पहिल्यांदाच लोकसभा सदस्य पदावर निवडून आले होते. २०२४च्या निवडणुकीसाठी राष्ट्रवादी काँग्रेसकडूनही काही नावे चर्चेत आली आहेत. आमदार राजेश टोपे यांचा घनसावंगी विधानसभा मतदारसंघ जालना लोकसभा मतदारसंघात नसून परभणी विधानसभा मतदारसंघामध्ये आहे. परंतु जालना लोकसभा उमेदवारीचा विषय निघाला की त्यांच्या नावाची चर्चा पक्षात हमखास असते. भोकरदनचे माजी आमदार चंद्रकांत दानवे यांचे नावही चर्चेत आहेत. राष्ट्रवादीकडून ते तीन वेळेस आमदारपदी निवडून आले होते. त्यांचे वडील कै. पुंडलिकराव दानवे जालना लोकसभा मतदारसंघातून दोनदा निवडून आले होते. याशिवाय पैठणचे माजी आमदार संजय वाघचौरे यांचे नावही इच्छुक उमेदवारांमध्ये घेतले जात आहे. राष्ट्रवादी काँग्रेसचे जिल्हाध्यक्ष डॉ. निसार देशमुख यांनी सांगितले की, आगामी लोकसभा निवडणूक लढविण्यासाठी आमचा पक्ष सज्ज आहे. या मतदारसंघात पक्षाचे मोठे जाळे आहे. महाविकास आघाडीकडून ही जागा राष्ट्रवादीला सोडवून घेण्याची मागणी आम्ही आमच्या पक्षश्रेष्ठींकडे केलेली आहे.

Latest Comment
View All Comments
Post Comment

मराठीतील सर्व सत्ताकारण बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: For jalna lok sabha constituency mahavikas aghadi is looking for a capable candidate against raosaheb danve print politics news asj

First published on: 01-12-2023 at 12:41 IST

संबंधित बातम्या

तुम्ही या बातम्या वाचल्या आहेत का? ×