पुणे शहरात पावसाची शक्यता निर्माण झाली असून वादळी वाऱ्यासह ढगांचा गडगडाट ऐकू येत आहे. पुणे वेधशाळेनं कालच याबाबत इशारा दिला होता. सकाळपासूनच शहरातील उकाड्यातही वाढ झाली होती, त्यानंतर संध्याकाळी साडे पाच वाजण्याच्या सुमारास शहरात अचानक अंधारुन आलं आणि ढगांचा गडगडाटही सुरु झाला. वेधशाळेच्या माहितीनुसार, आजपासून पुढील चार-पाच दिवस राज्यात पावसाची शक्यता आहे. कोकणातून पावसाला सुरुवात होऊन पुढील पाच-सहा दिवस पाऊस पडू शकतो. मुंबईतही २७-२८ तारखेपासून हलक्या पावसाची शक्यता आहे. मध्य महाराष्ट्रात आज आणि उद्या पावसाची शक्यता आहे. पुणे शहर आणि जिल्ह्याबाबत सांगायचं झाल्यास उद्या म्हणजेच २५ तारखेला एखाद-दुसऱ्या ठिकाणी पाऊस होण्याची शक्यता आहे. तसेच मध्य महाराष्ट्रात चार पाच दिवस हलका पाऊस होईल, असे भाकित पुणे वेधशाळेनेकडून वर्तवण्यात आले आहे.
