बाणेर येथे एका व्यक्तीच्या भूखंडावर अतिक्रमण करून रस्त्याची अडवणूक केल्याच्या आरोपावरून आमदार विनायक निम्हण, त्यांचा मुलगा नगरसेवक सनी निम्हण यांच्यासह इतर तिघांवर चतु:शृंगी पोलीस ठाण्यात शुक्रवारी गुन्हा दाखल करण्यात आला आहे. गेल्या रविवारी एका विंग कमांडरला मारहाण केल्याच्या आरोपावरून निम्हण व त्यांच्या मुलावर चतु:शृंगी पोलीस ठाण्यात गुन्हा दाखल झाला होता.
याबाबत विनय सुदाम कुंजीर (वय ४५, रा. साई चौक, नवी सांगवी) यांनी फिर्याद दिली आहे. त्यावरून आमदार निम्हण व इतर चौघांच्या विरुद्ध भारतीय दंड संहिता कलम ४२७, ४४७, ३४१, ३२३, ५०४, ५०६, ३४ अनुसार गुन्हा दाखल करण्यात आला आहे, अशी माहिती चतु:शृंगी  पोलिसांनी दिली. पोलिसांनी दिलेल्या माहितीनुसार, बाणेर येथील सव्र्हे क्रमांक ३९ येथे कुंजीर यांच्यासह इतर चार ते पाच जणांचे प्लॉट आहेत. या प्लॉटमध्ये निम्हण यांनी अतिक्रमण करून त्यांच्या रस्त्याची अडवणूक केली. त्या ठिकाणी गेल्यानंतर कुंजीर यांना धमकावून मारहाण केली म्हणून त्यांनी पोलिसांकडे तक्रार केल्यानंतर गुन्हा दाखल करण्यात आला आहे. इतर प्लॉटधारकांचे जबाब घेण्यात येणार आहेत, असे पोलीस निरीक्षक सुभाष निकम यांनी सांगितले.