पुणे: सीरम कंपनीत नोकरी लावण्याच्या आमिषाने तरुणांची ४१ लाखांची फसवणूक

सीरम इन्स्टिट्यूटमध्ये नोकरी लावण्याच्या आमिषाने हडपसर तसेच सासवड परिसरातील २८ तरुणांची ४१ लाख १५ हजार रुपयांची फसवणूक केल्या प्रकरणी सासवड पोलिसांनी गुन्हा दाखल केला आहे.या प्रकरणी मंगेश राजाराम पवार (वय ३२, रा. तुकाई दर्शन, फुरसुंगी, हडपसर) याच्या विरोधात गुन्हा दाखल करण्यात आला आहे. याबाबत अनिकेत जगन्नाथ जगताप (वय २४, रा. ताथेवाडी, सासवड) याने सासवड पोलीस ठाण्यात फिर्याद दिली आहे. तीन महिन्यांपूर्वी जगताप याची आरोपीशी ओळख झाली होती. सीरम इन्स्टिट्यूटमध्ये नोकरी लावण्याचे आमिष त्याने दाखविले होते. त्याच्याकडून पवारने ऑनलाइन पद्धतीने दीड लाख रुपये घेतले होते. त्याला कंपनीच्या नावाचे बनावट नियुक्तीपत्र देण्यात आले होते.