शुक्रवारी दिवसभरात जिल्ह्यातील ५७४ जणांना करोना संसर्गाचे निदान झाले आहे. राज्याच्या साथरोग सर्वेक्षण विभागाने याबाबत माहिती दिली. मात्र, बहुसंख्य करोना रुग्णांना सौम्य लक्षणे असून ते घरच्या घरी बरे होत असल्याने घाबरून जाण्याचे कारण नसल्याचे सार्वजनिक आरोग्य विभागाकडून स्पष्ट करण्यात आले आहे. शुक्रवारी दिवसभरात आढळलेल्या ५७४ नवीन रुग्णांपैकी ३३१ रुग्ण पुणे महापालिका क्षेत्रात आहेत. १३७ रुग्ण पिंपरी-चिंचवड महापालिका क्षेत्रात, तर १०६ रुग्ण जिल्ह्याच्या उर्वरित भागात आढळले आहेत. संसर्गाचा प्रसार रोखण्यासाठी विशेषत: जोखीम गटातील रुग्ण, सहव्याधीग्रस्त आणि ज्येष्ठ नागरिकांनी तसेच लसीकरण न झालेल्या नागरिकांनी मुखपट्टी वापरासह सर्व आवश्यक खबरदारी घेण्याचे आवाहन करण्यात येत आहे. शुक्रवारी आढळलेल्या ५७४ नव्या रुग्णांमुळे पुणे जिल्ह्यातील एकूण करोना रुग्णसंख्या १४ लाख ८६ हजार ७९३ एवढी झाली आहे.
