बावधनमध्ये ‘म्युझियम सिटी’ची निर्मिती; राजा केळकर संग्रहालयाच्या विस्ताराला गती

राजा दिनकर केळकर संग्रहालयाच्या विस्तारासंदर्भात अजित पवार यांच्या अध्यक्षतेखाली मंत्रालयात बैठक झाली. आमदार हेमंत रासने यांनी याबाबत माहिती दिली. या बैठकीला उच्च आणि तंत्र शिक्षणमंत्री चंद्रकांत पाटील, रासने, सांस्कृतिक कार्य अपर मुख्य सचिव विकास खरगे, नियोजन विभागाचे अपर मुख्य सचिव राजगोपाल देवरा, वित्तीय सुधारणा सचिव शैला ए, वित्त आणि नियोजन सचिव राजेश देशमुख, संग्रहालयाचे संचालक सुधन्वा रानडे, व्यवस्थापन मंडळाचे सदस्य सुरेंद्र रानडे, वास्तुरचनाकार राजेंद्र रानडे, प्रशासकीय अधिकारी भारती न्याती, तसेच व्हिडिओ कॉन्फरन्सद्वारे पुणे विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डुडी उपस्थित होते.

‘संग्रहालयाच्या विस्तारासाठी राज्य सरकारकडून यापूर्वीच बावधन बुद्रुक येथे ६ एकर जागा उपलब्ध करून देण्यात आलेली आहे. नवीन संग्रहालयाचे बांधकाम दर्जेदार, आकर्षक आणि शाश्वत पद्धतीने व्हावे, अशी स्पष्ट सूचना उपमुख्यमंत्र्यांनी केली आहे. कसबा मतदारसंघाचा आमदार म्हणून शिवकालीन, पेशवेकालीन आणि पुण्याच्या वैभवशाली वारशाच्या जतनाचा प्रयत्न आहे. शनिवारवाड्यासह अनेक ऐतिहासिक वास्तूंना पुनरुज्जीवित करण्यासाठी पाठपुरावा सुरू आहे. भविष्यात या ‘म्युझियम सिटी’ची ओळख जागतिक पातळीवर पोहोचेल,’ असे रासने यांनी सांगितले.

सुधन्वा रानडे यांनी संग्रहालय निर्मितीची पार्श्वभूमी आणि त्याच्या वैशिष्ट्यांचे सादरीकरण केले. ‘‘म्युझियम सिटी’ हा प्रकल्प केवळ संग्रहालय न राहता आंतरराष्ट्रीय दर्जाचा आणि शहराचा लौकिक जागतिक पातळीवर वाढविणारा पथदर्शी उपक्रम ठरेल,’ असे रानडे यांनी सांगितले.

वैभवशाली इतिहासाचे जतन आणि संवर्धन करणाऱ्या केळकर संग्रहालयात १४ व्या शतकापासूनच्या वीस हजारांहून अधिक वस्तूंचा संग्रहित ठेवा आहे. सध्या जागेअभावी केवळ ११ टक्के वस्तू जनतेसाठी खुल्या आहेत.- हेमंत रासने, आमदार