मांत्रिकाच्या सांगण्यावरुन पत्नीशी अघोरी कृत्य; व्यावसायिक पती, सासू, सासऱ्यासह मांत्रिकाच्या विरोधात गुन्हा

याबाबत एका महिलेने भारती विद्यापीठ पोलीस ठाण्यात फिर्याद दिली आहे. त्यानुसार पती, सासू, सासरे तसेच मांत्रिकाच्या विरोधात कौटुंबिक हिंसाचार, फसवणूक, नरबळी आणि जादूटोणा प्रतिबंध कायद्यानुसार गुन्हा दाखल करण्यात आला आहे. या प्रकरणात गुन्हा दाखल झालेला व्यावसायिक कात्रज परिसरातील आंबेगाव परिसरात राहायला आहे. त्याचा २०१३ मध्ये तक्रारदार महिलेशी विवाह झाला होता. विवाहानंतर तिचा पती, सासू, सासऱ्यांनी छळ सुरू केला. तिला शिवीगाळ करुन मारहाणही करण्यात आली होती. महिलेच्या आई-वडिलांनी हिरेजडीत सोन्याचे दागिने विश्वासाने पतीकडे ठेवण्यास दिले होते तसेच त्यांच्या सदनिकेची कागदपत्रे दिली होती.

दागिन्यांचा परस्पर अपहार करुन महिलेच्या आई-वडिलांनी दिलेल्या सदनिकेची कागदपत्रे एका बँकेत कर्ज प्रकरणात तारण म्हणून ठेवली होती. कागदपत्रांच्या आधारे ७५ लाख रुपयांचे कर्ज घेतले होते. त्यानंतर पती एका मांत्रिकाच्या संपर्कात आला. व्यवसायात भरभराट, घरात सुखशांती तसेच पुत्रप्राप्तीसाठी मांत्रिकाने व्यावसायिकाला काही तोडगे सांगितले होते. त्यानंतर अंधश्रद्धेच्या आहारी गेलेल्या पतीने महिलेला सर्वांसमोर आंघोळ करायला लावली. त्यानंतर पतीकडून वेगवेगळ्या प्रकारे छळ करण्यात आला तसेच मारहाणही करण्यात आली. पतीने एक ते दोन कोटी रुपयांची फसवणूक केली, असे महिलेने दिलेल्या फिर्यादीत म्हटले आहेत. पती, सासू, सासऱ्यांच्या त्रासामुळे अखेर महिलेने पोलिसांकडे तक्रार दिली. त्यानंतर या प्रकरणात गुन्हा दाखल करण्यात आला. वरिष्ठ पोलीस निरीक्षक जगन्नाथ कळसकर तपास करत आहेत.