अजित पवारांच्या चिंता वाढली? आमदार विलास लांडे शरद पवारांच्या संपर्कात? जवळचा मित्र म्हणाला, “त्या भेटीनंतर…”

आमदार अण्णा बनसोडे यांना प्रश्न विचारण्यात आला होता की भोसरीचे आमदार आणि तुमचे मित्र विलास लांडे हे त्यांच्या काही सर्थकांसह शरद पवार गटातील नेत्यांना भेटले आहेत. पिंपरी, चिंचवड, भोसरी या भागातील काही नगरसेवक शरद पवार गटाच्या संपर्कात आहेत. अनेक पदाधिकारी राष्ट्रवादी काँग्रेस पार्टीच्या शरद पवार गटाचं दार ठोठावत असल्याचे दावे केले जात आहेत. अशा स्थितीत त्या गटाकडून (शरद पवार) कोणी तुमच्याशी संपर्क साधला आहे का? किंवा आमदार विलास लांडे यांच्याशी तुमचं सध्याच्या राजकीय स्थितीवर काही बोलणं झालं आहे का? यावर उत्तर देताना अण्णा बनसोडे म्हणाले, विलास लांडे हे माझे खूप चांगले सहकारी आहेत. आम्ही दोघांनी गेल्या अनेक वर्षांपासून विधानसभेचे सदस्य म्हणून एकत्र काम केलं आहे. आमचा दोघांचा दररोज संपर्क होतो. मात्र या गोष्टींबाबत आम्ही एकमेकांशी कुठल्याही प्रकारची चर्चा केलेली नाही.

दरम्यान, आमदार विलास लांडे शरद पवारांच्या गटात जातील का? असा प्रश्न विचारल्यानंतर अण्णा बनसोडे म्हणाले, काल-परवा मी वृत्तवाहिन्यांवर आणि वृत्तपत्रांमध्ये अशा आशयाच्या बातम्या पाहिल्या. विलास लांडे आणि आमच्या पक्षातील काही नगरसेवकांनी शरद पवारांची भेट घेतली. मात्र माझ्या माहितीनुसार शरद पवारांना भेटल्यानंतर विलास लांडे यांनी अजित पवार यांची देखील भेट घेतली. अजित पवारांशी केलेल्या चर्चेनंतर विलास लांडे अजित पवार गटात थांबल्याचं चित्र स्पष्ट झालं आहे.

हे ही वाचा >> “विधानसभेसाठी अनेकांकडून संपर्क, मात्र मी…”, पिंपरीचे आमदार अण्णा बनसोडेंचं ठरलं

शिरूर लोकसभा मतदारसंघातून शिवसेनेचे माजी खासदार शिवाजीराव आढळराव-पाटील यांना राष्ट्रवादी काँग्रेसमध्ये घेऊन अधिकृत उमेदवारी दिल्याने नाराज झालेले भोसरीचे माजी आमदार विलास लांडे हे राष्ट्रवादी काँग्रेस शरदचंद्र पवार पक्षात जाणार असल्याची चर्चा आहे. तसेच शरद पवार गटातील काही नेते भोसरी, पिंपरी, चिंचवडमधील अजित पवार गटातील नगरसेवक आणि पदाधिकाऱ्यांना स्वगृही आणण्यासाठी त्यांच्या संपर्कात असल्याचे दावे केले जात आहेत.