पुणे : दहशतवादी संघटनेच्या संपर्कात असलेल्या संगणक अभियंता तरुणाला राज्य दहशतवाद विरोधी पथकाने (एटीएस) सोमवारी पुणे रेल्वे स्थानक परिसरातून अटक केली. झुबेर हंगरगेकर (वय ३२, रा. कोंढवा) असे अटक करण्यात आलेल्याचे नाव आहे. तो मूळचा सोलापूरचा असून, सध्या कोंढवा येथे वास्तव्यास होता.
झुबेरविरुद्ध बेकायदा हालचाली प्रतिबंधक कायद्यान्वये (यूएपीए) गुन्हा दाखल करण्यात आला आहे. तो माहिती-तंत्रज्ञान क्षेत्रात काम करीत असल्याची माहिती ‘एटीएस’च्या अधिकाऱ्यांनी दिली.
पुण्यातील ‘आयसिस मॉड्युल’च्या प्रकरणाशी संबंधित छापे ‘एटीएस’ने ९ ऑक्टोबर रोजी कोंढवा, वानवडी, खडकीसह शहरातील वेगवेगळ्या भागांत टाकले होती. या प्रकरणात १८ जणांना संशयावरून तााब्यात घेण्यात आले होते. त्यांच्याकडून १९ लॅपटॉप, मोबाइल संच, तसेच अन्य साहित्य जप्त करण्यात आले होते. लॅपटाॅपमधील माहितीचे विश्लेषण करण्यात आले. झुबेर हा दहशतवादी संघटनेच्या संपर्कात असल्याची माहिती मिळाली होती. झुबेर चेन्नईला गेला होता. चेन्नईहून परतताच त्याला पुुणे रेल्वे स्थानक परिसरातून ताब्यात घेण्यात आले.
२०२३ मध्ये पुण्यात पकडलेल्या ‘आयसिस’च्या दहशतवाद्यांनी मुंबई, पुणे, तसेच गुजरातमधील प्रमुख शहरात बाॅम्बस्फाेट घडवून आणण्याचा कट रचला होता. कोल्हापूर, सातारा जिल्ह्यातील जंगलात त्यांनी बाॅम्बस्फोटाची चाचणी केली होती. पुण्यातील कोंढवा भागात त्यांनी बाॅम्ब तयार करण्याचे प्रशिक्षण घेतल्याचे तपासात उघडकीस आले होते.
चार नोव्हेंबरपर्यंत कोठडी
‘झुबेर हंगरगेकरला सोमवारी न्यायालयात हजर करण्यात आले. झुबेर याच्या संगणकातून काही माहिती मिळाली आहे, तसेच त्याच्य घरातून काही आक्षेपार्ह साहित्य जप्त करण्यात आले आहे. तो एका दहशतवादी संघटनेच्या संपर्कात असल्याचे निष्पन्न झाले आहे. तो या संघटनेच्या संपर्कात कसा आला, यादृष्टीने तपास करण्यात येत आहे. तपासासाठी त्याला पोलीस कोठडीत ठेवण्यात यावे,’ अशी विनंती विशेष सरकारी वकील विलास पठारे यांनी युक्तिवादात केली. न्यायालयाने त्याला चार नोव्हेंबरपर्यंत पोलीस कोठडीत ठेवण्याचे आदेश दिले.
