पुणे : पुणे परिसरातील वाहतूक कोंडी दूर करण्यासाठी विविध यंत्रणांमार्फत उपाययोजनांवर भर दिला जात आहे. यात प्रामुख्याने वर्तुळाकार मार्गासह (रिंग रोड) इतर प्रस्तावित रस्ते रुंदीकरणाच्या अनुषंगाने तातडीने मोजणीसह भूसंपादन प्रक्रिया राबविण्याचे निर्देश पुणे महानगर प्रदेश विकास प्राधिकरणाचे (पीएमआरडीए) आयुक्त डॉ. योगेश म्हसे यांनी गुरुवारी दिले.
पुणे परिसरातील वाहतूक कोंडी दूर करण्यासाठी विविध प्रशासकीय यंत्रणांच्या अधिकाऱ्यांची संयुक्त बैठक डॉ. म्हसे यांनी घेतली. या बैठकीत प्रामुख्याने प्रस्तावित रस्ते रुंदीकरणाच्या अनुषंगाने तातडीने मोजणीसह भूसंपादन प्रक्रिया राबविण्याचे निर्देश त्यांनी दिले. ते म्हणाले, ‘पुणे शहरासह इतर काही भागांत सातत्याने होणारी वाहतूक कोंडी सोडविण्यासाठी पावले उचलली जात आहेत. हिंजवडी आणि चाकण भागातील वाहतुकीसह नागरी समस्या सोडविण्यासाठी रस्ते रुंदीकरणासह विविध उपाययोजना करण्यात येत आहेत. यासह वर्तुळाकार मार्ग (रिंग रोड) आणि राष्ट्रीय महामार्गांसाठी आवश्यक असलेल्या जमिनीची भूसंपादन प्रक्रिया सुरू आहे. यासंदर्भात तातडीने मोजणी करून भूसंपादन प्रस्ताव जिल्हाधिकाऱ्यांकडे पाठवावा.’
या बैठकीला जिल्हाधिकारी जितेंद्र डुडी, पीएमआरडीएचे अतिरिक्त आयुक्त दीपक सिंगला, विकास परवानगी आणि नियोजन विभागाचे संचालक अविनाश पाटील, मुख्य अभियंता रिनाज पठाण, भूसंपादन समन्वय अधिकारी कल्याण पांढरे, सहआयुक्त हिम्मत खराडे, भूमिअभिलेख विभागाच्या अधीक्षक आशा जाधव, पुणे महापालिका, राष्ट्रीय महामार्ग प्राधिकरण, सार्वजनिक बांधकाम विभाग यांच्यासह इतर विभागांचे वरिष्ठ अधिकारी उपस्थित होते.
वर्तुळाकार मार्गासाठी टप्प्याटप्प्याने भूसंपादन प्रक्रिया राबविण्यात येत असून, आजपर्यंत झालेल्या कार्यवाहीचा आढावा आयुक्त डॉ. म्हसे आणि जिल्हाधिकारी डुडी यांनी या बैठकीत घेतला. वर्तुळाकार मार्गाच्या (रिंग रोड) पहिल्या टप्प्यात नाशिक महामार्ग ते नगर रस्ता या दरम्यानच्या सोलू, सोलू इंटरचेंज, वडगाव शिंदे आणि निरगुडी या गावांमधील मोजणी पूर्ण झाली असून, भूसंपादनाची प्रक्रिया अंतिम टप्प्यात आहे. दुसऱ्या टप्प्यात नगर रस्ता ते सोलापूर रस्ता या मार्गावरील आंबेगाव खुर्द आणि भिलारेवाडीची संयुक्त मोजणी पूर्ण झाली आहे. तिसऱ्या टप्प्यात सोलापूर रस्ता ते सातारा रस्ता आणि चौथ्या टप्प्यात सातारा रस्ता ते पौड रस्ता या मार्गावरील भूसंपादन प्रक्रियेवर या बैठकीत चर्चा झाली. या मार्गाला गती देण्यासाठी आवश्यक पावले उचलण्यावरही बैठकीत चर्चा करण्यात आली.
हिंजवडी आणि चाकण भागातील वाहतुकीसह नागरी समस्या सोडविण्यासाठी रस्ते रुंदीकरणासह विविध उपाययोजना करण्यात येत आहेत. यासह वर्तुळाकार मार्ग (रिंग रोड) आणि राष्ट्रीय महामार्गांसाठी आवश्यक असलेल्या जमिनीची भूसंपादन प्रक्रिया सुरू आहे.- डॉ. योगेश म्हसे, आयुक्त, पीएमआरडीए
