चिंचवड विधानसभेत दिवाळी गिफ्ट; विविध विकासकामांसाठी शासनाकडून १२ कोटींचा निधी

भारतरत्न डॉ. बाबासाहेब आंबेडकर सामाजिक विकास योजनेंतर्गत १४ कामांसाठी दोन कोटी रुपयांचा निधी मंजूर करण्यात आला. त्या अंतर्गत किवळे एमबी कॅम्प झोपडपट्टीत पाण्याची लाइन, सांडपाणी वाहिनी, वाचनालय उभारणे, काँक्रिटीकरण करणे, सभा मंडप बांधणे, तसेच नागसेननगर झोपडपट्टी येथे वाहतूक बेटाचे सुशोभीकरण करणे, नवीन स्वच्छतागृह उभारणे, पिंपळे गुरव लक्ष्मीनगर येथे बुद्धविहाराची सीमाभिंत व विहारात अभ्यासिका तयार करणे, वेताळनगर झोपडपट्टी बौद्धविहार परिसरात विविध कामे करणे, जगतापनगर (थेरगाव) येथील दलितवस्ती परिसरात आणि राजीव गांधीनगर (पिंपळे गुरव) झोपडपट्टीत सांडपाणीवाहिनी टाकणे या कामांचा समावेश आहे.

‘वाढत्या शहरीकरणामुळे नागरिकांच्या मूलभूत सोयी-सुविधांची गरज प्रचंड वाढली आहे. शासनाकडून मंजूर झालेला हा बारा कोटींचा निधी म्हणजे विकसित आणि स्मार्ट चिंचवड मतदारसंघाच्या सर्वांगीण प्रगतीसाठी महत्त्वपूर्ण ठरेल. विशेषतः वाकड, पुनावळे, रावेत, मामुर्डी आणि किवळे या झपाट्याने विकसित होत असलेल्या भागातील नागरिकांना या कामांचा जास्तीत जास्त प्रमाणात लाभ होईल. खेळाडू, ज्येष्ठ नागरिक, महिला आणि युवकांसाठी निर्माण होणारी नवीन केंद्रे ही आरोग्यदायी, सशक्त आणि विकसित चिंचवडच्या’ निर्मितीकडे एक ठोस पाऊल आहे. शासन निधीचा योग्य वापर करून प्रत्येक नागरिकापर्यंत विकास पोहोचवणे, हेच आमचे ध्येय’ असल्याचे आमदार शंकर जगताप यांनी सांगितले.