पुणे : घरची परिस्थिती बिकट असूनही जिद्द,चिकाटी आणि कठोर परिश्रमाच्या बळावर बहरिन येथे झालेल्या आशियाई क्रीडा स्पर्धेत सनी फुलमाळीने भारतासाठी सुवर्णपदक कमवले. यामुळे त्याचं आयुष्यच पालटलं आहे. लोहगावमधील पालावर राहून कुस्तीमध्ये सुवर्ण कामगिरी करणाऱ्या सनीचे पालकत्व राज्याचे उच्च आणि तंत्र शिक्षणमंत्री चंद्रकांत पाटील यांनी घेतले. लोकसहभागातून घर आणि सरावासाठी तालीम, शिक्षणासाठी सर्वतोपरी मदत आणि स्वतःच्या पगारातून दरमहा ५० हजार रुपये देण्याची घोषणा पाटील यांनी केली.
सनी आणि त्याच्या कुटुंबाची लोहगावमधील पालावर जाऊन चंद्रकांत पाटील यांनी भेट घेतली आणि अभिनंदन करुन त्याच्या कामगिरीचे कौतुक केले. यावेळी सनीचे प्रशिक्षक वस्ताद सदाशिव राखपसरे, भाजपा क्रीडा आघाडीचे प्रदेशाध्यक्ष संदीप भोंडवे, माजी नगरसेवक बॅाबी टिंगरे यांच्यासह परिसरातील नागरिक उपस्थित होते.
चंद्रकांत पाटील म्हणाले, जिद्द, चिकाटी आणि कठोर मेहनतीच्या बळावर सनीने मिळवलेले यश हे अतिशय कौतुकास्पद आहे. त्याने आपल्या कामगिरीने आई वडिलांचं नाव काढलं आहे. डोक्यावर छप्पर नसतानाही पालावर राहून त्याने ही कामगिरी केली. सनीला लोकसहभागातून घर आणि कुस्तीच्या सरावासाठी तालीम बांधून देणार आहे. त्यासोबतच शिक्षणासाठीही सर्वतोपरी मदत करणार असून, माझ्या आणि पत्नीच्या उत्पन्नातून उदरनिर्वाहासाठी दरमहा ५० हजार रुपये देणार असल्याचं त्यांनी सांगितले.
शिक्षण पूर्ण करण्यासोबतच सनी याने कुस्तीकडेदेखील लक्ष केंद्रित करावे. ऑलिम्पिकमध्येही सुवर्ण कामगिरी करावी, तसेच आंतरराष्ट्रीय किंवा राष्ट्रीय स्तरावरील क्रीडा स्पर्धेत चमकदार कामगिरी करुन पदक मिळवणाऱ्या खेळाडूंना शासकीय सेवेत सामावून घेण्याचा मुख्यमंत्री देवेंद्र फडणवीस यांच्या काळात यापूर्वीच निर्णय झालेला असून, राज्यभरातील असंख्य खेळाडूंना त्याचा लाभ झालेला आहे. मात्र सदर निर्णय हा १७ वर्षांवरील खेळाडूंना लागू आहे. त्यामुळे सनीच्या निमित्ताने १७ वर्षांखालील खेळाडूंनाही प्रोत्साहन मिळावे यासाठी मुख्यमंत्री देवेंद्र फडणवीस यांच्याकडे पाठपुरावा करणार असल्याचे पाटील यांनी सांगितले.
