घर खरेदी करताय…आधी महारेराचे प्रमाणपत्र तपासा! महारेराकडून नोंदणी प्रमाणपत्रात मोठे बदल

‘महारेरा’च्या आधीच्या प्रमाणपत्रात फक्त प्रकल्प आणि प्रवर्तकाचे नाव, पत्ता हा तपशील एका ओळीत दिला जात असे. आता ही माहिती वाचायला आणि समजायला सोपी जावी यासाठी ठळकपणे देण्यात येणार आहे. या प्रमाणपत्राच्या परिशिष्टात प्रकल्पाचे एकूण क्षेत्रफळ, इमारतीचे आणि विंगचे नाव अथवा क्रमांक, निवासयोग्य मजले, निवासी सदनिका आणि अनिवासी गाळ्यांची एकूण संख्या, इमारतीला किती मजल्यांपर्यंत परवानगी मिळालेली आहे त्याचा तपशील दर्शवणारे प्रारंभ प्रमाणपत्र, चारचाकी, दुचाकी आणि अभ्यागतांसाठींच्या एकूण वाहनतळाची संख्या हा सर्व तपशील या प्रमाणपत्राच्या परिशिष्टात असणार आहे.

प्रवर्तकाने प्रकल्पात केलेल्या दुरुस्त्या, मुदतवाढ आणि प्रकल्पाचे दुसऱ्या प्रवर्तकाकडे हस्तांतर हा तपशीलही या प्रकल्पाला भविष्यात दिल्या जाणाऱ्या सुधारित प्रमाणपत्रात असेल. प्रवर्तकांनी महारेरा प्रमाणपत्र प्रकल्पस्थळी व प्रकल्पाच्या संकेतस्थळावर ठळकपणे प्रदर्शित करणे आवश्यक आहे. प्रकल्पाच्या नोंदणी क्रमांकाच्या मदतीने प्रकल्पाबाबतची माहिती ‘महारेरा’च्या संकेतस्थळावर शोधता येते. याचबरोबर प्रकल्पाशी संबंधित सर्व प्राथमिक माहिती क्यूआर कोडमध्ये देऊन सर्व माध्यमांतील जाहिरातींमध्ये प्रकल्पाच्या नोंदणी क्रमांकाबरोबर छापणे ‘महारेरा’ने पूर्वीच बंधनकारक केलेले आहे. हा क्यूआर कोड स्कॅन करूनही प्रकल्पाशी संबंधित प्राथमिक माहिती मिळवता येते.

नवीन महारेरा नोंदणी प्रमाणपत्रांची वैशिष्ट्ये

– प्रकल्प व प्रवर्तकाचे नाव, पत्ता, नोंदणी क्रमांक ठळक स्वरूपात

– प्रकल्पाचे बांधकाम क्षेत्रफळ

– इमारतीचे, विंगचे नाव अथवा क्रमांक

– प्रकल्पाचे निवासयोग्य मंजूर मजले

– निवासी अथवा अनिवासी इमारती

– बांधकाम परवानगी किती मजल्यांपर्यंत आहे, हे दर्शवणारे प्रमाणपत्र

– चारचाकी, दुचाकी, अभ्यागतांसाठी एकूण वाहनतळ

घर खरेदीदारांना मदत व्हावी, यासाठी ‘महारेरा’कडून नवीन गृहनिर्माण प्रकल्पांना दिल्या जाणाऱ्या नोंदणी प्रमाणपत्रांवरच प्रकल्पाबाबतच्या प्राथमिक आणि महत्त्वाच्या बाबींचा उल्लेख करायला ‘महारेरा’ने सुरुवात केली आहे. ग्राहकाने सजगपणे या बाबी समजावून घेऊन, त्यातील कायदेशीर बाबी तपासून घर खरेदी करावे. – मनोज सौनिक, अध्यक्ष महारेरा