सलग सुट्ट्यांमुळे द्रुतगती मार्गावर कोंडी, उन्हाळ्यामुळे मुंबईतील पर्यटक लोणावळ्यात दाखल

दहावी आणि बारावीची परीक्षा संपल्या आहेत. गुड फ्रायडेला जोडून शनिवार आणि रविवारची सुट्टी आल्याने मुंबईतील पर्यटक मोठ्या संख्येने सहकुटुंब फिरायला बाहेर पडले. खंडाळा घाटात शुक्रवारी सकाळपासून वाहतूक ठिकठिकाणी विस्कळीत झाली. वाहतूक संथ झाल्याने वाहनांच्या रांगा लागल्याचे पाहायला मिळाले. वाहतूक कोंडी सोडविण्यासाठी खंडाळा महामार्ग पोलीस आणि बोरघाट महामार्ग पोलिसांनी उपाययोजना केल्या.

हेही वाचा…‘गोविंदाचे स्वागत अन् मला नाटक्या, नौटंकी…’, डॉ. अमोल कोल्हेंचे शिवाजीराव आढळराव पाटलांना प्रत्युत्तर, मुख्यमंत्र्यांचे मानले आभार

पुण्याकडे जाणाऱ्या मार्गिकेवर कोंडी झाल्याने मुंबईकडे जाणारी वाहतूक थांबविली. त्यानंतर सर्व मार्गिका पुण्याकडे जाणाऱ्या वाहनांना सर्व मार्गिकांवरुन सोडण्यात आली. पुण्याकडे जाण्यासाठी मार्गिका उपलब्ध झाल्याने घाट क्षेत्रातील वाहतूक दुपारनंतर सुरळीत झाली. गेल्या आठवड्यापासून उन्हाळा वाढल्याने लोणावळा, पवनानगर, महाबळेश्वर, पाचगणीकडे जाणाऱ्या पर्यटकांची संख्या वाढली आहे. शुक्रवारी सकाळपासून खंडाळा आणि लोणावळा परिसरात मोठ्या संख्येने पर्यटकांची वाहने दाखल झाली. लोणावळा शहरात वाहतूक कोंडी झाली.