पुरंदर विमानतळासाठी सात गावांत मोजणी, विरोधामुळे पारगावातील काही गट वगळले

पुरंदर विमानतळासाठी कुंभारवळण, वनपुरी, खानवडी, उदाचीवाडी, मुंजवडी, एखतपूर आणि पारगाव अशा सात गावांमधून १ हजार २८५ हेक्टर जमीन संपादित करण्यात येणार आहे. त्यासाठी २६ सप्टेंबरपासून सात गावांमधून मोजणीची प्रक्रिया सुरू करण्यात आली होती. मोजणीसाठी जिल्हा प्रशासनाने पाच पथके तयार केली होती. त्या पथकामार्फत ही मोजणी पू्र्ण करण्याची जबाबदारी सोपविण्यात आली होती. त्यासाठी भूसंपादन अधिकारी समन्वयक डॉ. कल्याण पांढरे, उपविभागीय अधिकारी वर्षा लांडगे, तसेच भूसंपादन अधिकारी डॉ. संगीता चौगुले-राजापूरकर या तीन अधिकाऱ्यांच्या नेतृत्वात ही मोजणीप्रक्रिया पूर्ण करण्यात आली.

पारगाववगळता उर्वरित गावांमध्ये मोजणीची प्रक्रिया शातंतेत पूर्ण झाली. पारगावात काही शेतकऱ्यांनी मोजणी करण्यास विरोध दर्शविला. त्यामुळे त्या शेतकऱ्यांच्या जमिनीचा गट वगळता जिल्हा प्रशासनाने मोजणी पूर्ण केल्याची माहिती जिल्हा प्रशानसाकडून देण्यात आली. काही शेतकऱ्यांकडून विरोध होत असला, तरी हा विरोध तात्पुरता असून, त्यांच्याकडून संमती घेण्यात येणार आहे. तत्पूर्वी विरोधाच्या पार्श्वभूमीवर जिल्हा प्रशासनाने ड्रोन सर्वेक्षणाद्वारे सातही गावांतील १ हजार २८५ हेक्टरची मोजणी गेल्या आठवड्यात पूर्ण केली होती. त्यामुळे शेतकऱ्यांचा विरोध असला, तरी मोजणीची प्रक्रिया पूर्ण करण्यात यश आल्याचा दावा जिल्हा प्रशासनाने केला आहे. येत्या काही दिवसांत त्या शेतकऱ्यांचे मन वळविण्याचे आणि संमती घेण्यात येणार असल्याचे जिल्हा प्रशासनाकडून सांगण्यात आले.

सात गावांतील ३ हजार २०० शेतकऱ्यांनी २८१० एकर जागेसाठी संमती दिली आहे. या शेतकऱ्यांशी चर्चा करून जागेच्या मोबदल्याचे स्वरूप निश्चित करण्याचे काम लवकरच हाती घेण्यात येणार असून, पुढील आठवड्यात त्या संदर्भात शेतकऱ्यांबरोबर बैठक होण्याची शक्यता आहे.

पुरंदर विमानतळासाठी सात गावांमधील प्रत्यक्ष जागेवरील मोजणीमध्ये काही किरकोळ गटवगळता संपूर्ण क्षेत्राची मोजणी पूर्ण करण्यात आली आहे. त्यामुळे आता पुढील प्रक्रिया लवकरच सुरू करण्यात येईल. – जितेंद्र डुडी, जिल्हाधिकारी