जिल्ह्यातील सन २०२१-२२ या वर्षातील १९४ अपूर्ण कामांसाठी १२ कोटी ६८ लाख रुपयांचा निधी जिल्हा नियोजन समितीकडून (डीपीडीसी) जिल्हा परिषदेला देण्यात येणार आहे. या १९४ अपूर्ण कामांमध्ये प्राथमिक आरोग्य केंद्रे, उपकेंद्रे, आयुर्वेदिक दवाखान्यांची देखभाल दुरुस्ती, बांधकाम, विस्तारीकरण करण्याचे प्रस्तावित करण्यात आले आहे.
यापूर्वी या कामांना जिल्हा परिषदेच्या मुख्य कार्यकारी अधिकाऱ्यांनी पाठवलेल्या प्रस्तावाला प्रशासकीय मान्यता देण्यात आली आहे. त्या वेळी ११ कोटी ९४ लाख रुपये वर्ग करण्यात आले होते. असे एकूण २४ कोटी ६२ लाख रुपयांचा निधी जिल्हा परिषदेला प्राप्त होणार आहे.
हेही वाचा : पिंपरीतील राजकीय सत्तासंघर्षात नव्या आयुक्तांनाही तारेवरची कसरत
करोनाच्या काळात आरोग्य यंत्रणा सक्षम करण्याची गरज प्रकर्षाने जाणवली. त्यानंतर ग्रामीण भागातील आरोग्य यंत्रणा अधिक सक्षम करण्यासाठी प्रशासकीय पातळीवरून हालचालींना वेग आला आहे. त्यामध्ये प्राथमिक आरोग्य केंद्र बांधणे आणि विस्तारीकरणाचा देखील समावेश असल्याने प्राथमिक आरोग्य केंद्रे अधिक चांगली होण्यास मदत होणार आहे.
