पुणे : भरधाव टेम्पोच्या धडकेत दुचाकीस्वार तरुणाचा मृत्यू झाल्याची घटना नगर रस्त्यावरील वाघोली भागात घडली. या प्रकरणी टेम्पो चालका विरुद्ध गुन्हा दाखल करण्यात आला आहे.
सुनील ज्ञानेश्वर पाटील (वय ४०, रा. लोणीकंद, नगर रस्ता) असे मृत्युमुखी पडलेल्या दुचाकीस्वाराचे नाव आहे. याबाबत पाटील यांचा भाऊ संदीप (वय ३७) यांनी वाघोली पोलीस ठाण्यात फिर्याद दिली आहे. या प्रकरणी टेम्पो चालक प्रदीप शिवेंद्र सिंग (वय ४०, रा. रांजणगाव, ता. शिरूर, जि. पुणे) याच्याविरुद्ध गुन्हा दाखल करण्यात आला आहे. पोलिसांनी सिंग याला ताब्यात घेतले आहे.
पाेलिसांनी दिलेल्या माहितीनुसार, दुचाकीस्वार सुनील पाटील हे गुरुवारी (९ ऑक्टोबर) दुपारी दीडच्या सुमारास वाघोली परिसरातून निघाले होते. कटकेवाडी फाटा चौकात भरधाव टेम्पोने दुचाकीला पाठीमागून धडक दिली. अपघातात दुचाकीस्वार पाटील गंभीर जखमी झाले. अपघाताची माहिती मिळताच पोलिसांनी घटनास्थळी धाव घेतली.
गंभीर जखमी झालेल्या पाटील यांना खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. अपघातानंतर टेम्पो चालक सिंग याला ताब्यात घेण्यात आले असून, पोलीस उपनिरीक्षक शेंडगे तपास करत आहेत. शहर परिसरात गेल्या आठवड्यापासून गंभीर स्वरूपाच्या अपघातांच्या घटनांमध्ये वाढ झाली आहे. आठवडभरात वेगवेगळ्या अपघातात सात जणांचा मृत्यू झाला आहे.
