पाटस येथील दुहेरी हत्याकांडातील चारही आरोपी १२ तासात जेरबंद!

ही कामगिरी ही मा.पोलीस अधीक्षक डॉ.अभिनव देशमुख सो., बारामती विभाग अपर पोलिस अधीक्षक मिलींद मोहिते यांच्या मार्गदर्शनाखाली स्थानिक गुन्हे शाखेचे पोलीस निरीक्षक पद्माकर घनवट, पोलीस उपनिरीक्षक रामेश्वर धोंडगे, महेश गायकवाड, निलेश कदम, दत्ता तांबे, सचिन गायकवाड, सुभाष राऊत, गुरु गायकवाड, अभिजित एकाशिंगे, काशिनाथ राजापुरे, शब्बीर पठाण, विद्याधर निचित प्रमोद नवले, गुरु जाधव यांनी केलेली आहे.

पाटस, तामखडा वस्ती येथील भानोबा मंदिराच्या समोरून महेश उर्फ मन्या भागवत याने शिवम शितकल यास  ४ जुलै रोजी रात्री १० वाजेच्या सुमारास फोनवरुन शिवीगाळ करून दम देत, तामखडा येथे बोलवले होते. यावर शिवम शितकल व गणेश माकर हे दोघे (रा.पाटस अंबिकानगर ता.दौंड जि.पुणे) हे शिव्या का दिल्या याचा जाब विचारण्यासाठी तामखडा येथे गेले असता, तेथे आरोपी महेश उर्फ मन्या भागवत, महेश टुले (रा.पाटस, तामखडा ता.दौंड जि.पुणे) व त्यांच्यासोबतचे अनोळखी साथीदार यांनी शिवम शितकल (वय २३) व गणेश माकर (वय २३) या दोघांना तलवार, काठयांनी जबर मारहाण करुन खाली पाडून त्यांच्या डोक्यावर दगड मारुन त्यांचा निघृणपणे खून केला व यानंतर ते पळून गेले. याबाबत यवत पोलीस स्टेशनला खून व आर्म ॲक्ट प्रमाणे गुन्हा दाखल करण्यात आलेला होता.

हा गुन्हा गंभीर स्वरुपाचा असल्याने व खून करून आरोपी फरार झाल्याने गुन्ह्यांचा समांतर तपास स्थानिक गुन्हे शाखेमार्फत करण्याबाबत पोलीस अधीक्षक डॉ. अभिनव देशमुख यांनी आदेश दिलेले होते . त्याप्रमाणे स्थानिक गुन्हे शाखेचे पोलीस वरिष्ठ पद्माकर घनवट यांचे मार्गदर्शनाखाली पोलीस उपनिरीक्षक रामेश्वर धोंडगे, महेश गायकवाड, निलेश कदम, दत्ता तांबे, सचिन गायकवाड, सुभाष राऊत, गुरु गायकवाड, अभिजित एकाशिंगे, काशिनाथ राजापुरे, शब्बीर पठाण, विद्याधर निचित प्रमोद नवले, गुरु जाधव यांचे पथक नेमण्यात आलेले होते.

यवत पोलीस स्टेशन कडूनही गुन्ह्याच्या तपासासाठी दोन पथके नेमण्यात आली होती. स्थानिक गुन्हे शाखेचे पथक तपास करीत असताना गुन्हयातील आरोपी हे बारामती एअरपोर्ट रोड येथील जंगलात लपून बसल्याची माहिती मिळाली होती. गुन्हे शाखेचे पथकाने त्या ठिकाणी जाऊन सापळा रचून फरारी झालेले आरोपी १. महेश उर्फ मन्या संजय भागवत (रा.पाटस , तामखडा ता.दौंड जि.पुणे) २. महेश मारुती टुले (रा.पाटस , तामखडा ता.दौंड जि.पुणे) ३. युवराज शिंदे (रा.गिरीम , मदनेवस्ती ता.दौंड जि.पुणे) ४. गहिनीनाथ माने (रा.गिरीम , रोघोबानगर ता.दौंड जि.पुणे) यांना ताब्यात घेतलेले आहे. सदर आरोपींनी गुन्ह्याची कबुली दिलेली असून आरोपींना पुढील कारवाईसाठी यवत पोलीस स्टेशनचे ताब्यात दिलेले आहे. पुढील अधिक तपास यवत पोलीस स्टेशनचे पोलीस निरीक्षक भाऊसाहेब पाटील हे करीत आहेत.