पुणे : उच्च शिक्षणासाठी परदेशात जाण्यासाठी विद्यार्थ्यांना अनेक अडचणी येतात. तसेच शिक्षण झाल्यानंतर, परदेशातच उपलब्ध होणाऱ्या नोकरीच्या संधींबाबत सहाय्य, ही सर्व प्रक्रिया विना अडथळा दूर करून विद्यार्थ्यांना आवश्यक कागदपत्रांची माहिती मिळावी म्हणून स्मार्ट स्टडी या संस्थेकडून शनिवारी (२७ सप्टेंबर) ‘ग्लोबल एज्युकेशन फेअर २०२५’ चे आयोजन करण्यात आले आहे.
बोट क्लब येथे सकाळी ११ ते सायंकाळी ५ वाजेपर्यंत होणाऱ्या कार्यक्रमात उच्च अमेरिका, यूएसए, आयर्लंड, जर्मनी, दुबईसह विविध देशांतील ६० हून अधिक नामांकित विद्यापीठांचे प्रतिनिधी उपस्थित राहणार असून विद्यार्थी आणि पालकांना यांच्याशी थेट संवाद साधता येणार आहे, अशी माहिती स्टडी स्मार्टचे व्यवस्थापकीय संचालक चेतन जैन यांनी सोमवारी पत्रकार परिषदेत दिली. विद्यार्थ्यांना परदेशात उच्च शिक्षण घेण्यासाठी हा कार्यक्रम एकाच छताखाली संपूर्ण मार्गदर्शन देणारा ठरणार असून, प्रवेश विद्यार्थ्यांसाठी आणि पालकांसाठी मोफत आहे.
बारावी किंवा पदवी पूर्ण केल्यानंतर हजारो विद्यार्थी परदेशात शिक्षण घेण्याचे स्वप्न बाळगतात; मात्र योग्य विद्यापीठाची निवड, प्रवेशप्रक्रिया, शिष्यवृत्ती, आर्थिक नियोजन आणि राहण्याची सोय याबाबत अनेकांना संभ्रम असतो. ग्लोबल एज्युकेशन फेअर या सर्व प्रश्नांवर तोडगा काढण्यासाठी विशेष कार्यक्रम आयोजित करण्यात आला आहे.
या फेअरमध्ये शिष्यवृत्ती, आर्थिक मदत योजना, जानेवारी आणि सप्टेंबर २०२६ प्रवेश संधी, स्पॉट ऑफर्स, आयईएलटीएस वेव्हर्स, तसेच परदेशात शिक्षणानंतर उपलब्ध होणाऱ्या नोकरीच्या संधींबाबत मार्गदर्शन करणाऱ्या इंटरॅक्टिव्ह वर्कशॉप्स आयोजित करण्यात येणार आहेत. याशिवाय, स्टडी स्मार्टचे तज्ज्ञ प्रत्यक्ष एक-एक विद्यार्थ्यांना व पालकांना वैयक्तिक मार्गदर्शन करतील, ज्यामुळे अचूक व प्रत्यक्ष माहिती प्राप्त करता येणार आहे. विद्यार्थ्यांना मदत करण्यासाठी करिअर काउन्सेलिंग, शैक्षणिक कर्ज, निवास व्यवस्था, फॉरेक्स आणि प्रवास सहाय्य यांसाठी स्वतंत्र डेस्क्स देखील ठेवण्यात येतील. यामध्ये विद्यार्थ्यांना लवचिक कर्ज योजना, आवश्यक कागदपत्रांची माहिती आणि योग्य निधी मिळवण्याचे मार्गदर्शन दिले जाणार आहे, असेही जैन यांनी नमूद केले.
