पुणे : राज्यसेवा परीक्षेचा नवा अभ्यासक्रम २०२५ पासून लागू करण्यासाठी गेल्या काही दिवसांत झालेल्या आंदोलनांनंतर अखेर महाराष्ट्र लोकसेवा आयोगाने निर्णय घेतला. त्यानुसार आता नव्या अभ्यासक्रमाची अंमलबजावणी २०२५ पासून करण्यात येणार असल्याचे एमपीएससीने ट्विटद्वारे जाहीर केले.
एमपीएससीने राज्यसेवा परीक्षेसाठी युपीएससीच्या धर्तीवर अभ्यासक्रम आणि मुख्य परीक्षा वर्णनात्मक स्वरुपाची करण्याचा निर्णय घेतला. या निर्णयाची अंमलबजावणी २०२३ पासून करण्याचेही स्पष्ट करण्यात आले. मात्र नव्या अभ्यासक्रमासाठी वेळ मिळावा म्हणून नव्या अभ्यासक्रमाची अंमलबजावणी २०२५ पासून करण्याच्या मागणीसाठी आंदोलने करण्यात आली. गेल्या तीन दिवसांपासून पुण्यात आंदोलन सुरू होते. ज्येष्ठ नेते शरद पवार यांच्यासह अनेक नेत्यांनी या आंदोलनाला भेट दिली. मुख्यमंत्र्यांसह दोन दिवसांत बैठक घेण्याचे आश्वासन शरद पवार यांनी आंदोलकांना दिले. त्यानंतर आता एमपीएससीने २०२५ पासून अंमलबजावणी करण्याचा निर्णय जाहीर केला.
हेही वाचा – ‘दगडूशेठ’च्या गोडसे परिवाराचा पाठिंबा असल्याचा महाविकास आघाडीचा दावा
हेही वाचा – मुख्यमंत्री एकनाथ शिंदे यांनी मुक्ता टिळक यांच्या कुटुंबीयांची घेतली भेट
राज्यसेवा मुख्य परीक्षेच्या वर्णनात्मक स्वरुपाच्या परीक्षेसंदर्भातील उमेदवारांची मागणी, कायदा व सुव्यवस्थेची निर्माण झालेली परिस्थिती व उमेदवारांना तयारीसाठी द्यावयाचा अतिरिक्त कालावधी विचारात घेऊन सुधारित परीक्षा योजना व अभ्यासक्रम सन २०२५ पासून लागू करण्यात येत आहे, असे एमपीएससीने ट्विटद्वारे जाहीर केले.
