भाजपचा पुण्यातील उमेदवार दिल्लीतून ठरणार? in pune bjp s lok sabha candidate will be decided from the delhi s bjp high command

पुण्याच्या उमेदवाराचे नाव केंद्रीय संसदीय समिती निश्चित करेल, अशी भूमिका भाजप शहराध्यक्ष धीरज घाटे यांनी सोमवारी मांडली.

भाजपचा पुण्यातील उमेदवार दिल्लीतून ठरणार? (संग्रहित छायाचित्र)

पुणे : आगामी लोकसभा निवडणुकीसाठी भाजपमधील संभाव्य उमेदवारांमध्ये तीव्र स्पर्धा सुरू झाली असतानाच पुण्याचा उमेदवार कोण असेल, या संदर्भात शहर भाजपच्या नेत्यांकडून सावध भूमिका घेण्यात आली आहे. उमेदवार पुण्याचा असेल, की पुण्याबाहेरचा याचा निर्णय वरिष्ठ पातळीवर होईल. त्या संदर्भात तूर्त काही बोलता येणार नाही. पुण्याच्या उमेदवाराचे नाव केंद्रीय संसदीय समिती निश्चित करेल, अशी भूमिका भाजप शहराध्यक्ष धीरज घाटे यांनी सोमवारी मांडली.

आगामी लोकसभा निवडणुकीसाठी भाजपकडून प्रदेश सरचिटणीस मुरलीधर मोहोळ, माजी आमदार जगदीश मुळीक यांच्यासह राष्ट्रीय स्वयंसेवक संघाचे पूर्व प्रचारक सुनील देवधर यांच्या नावाची चर्चा आहे. देवधर यांनी त्या दृष्टीने जोरदार तयारी सुरू केल्याने आणि पुणेकर असल्याचा प्रचार त्यांनी सुरू केल्याने या तिघांपैकी कोणाला संधी मिळणार, याबाबत चर्चा सुरू झाली आहे. या संदर्भात शहराध्यक्ष घाटे यांच्याकडे विचारणा केली असता, त्यांनी सावध भूमिका मांडली.

हेही वाचा : पुणे जिल्ह्यातील तिसऱ्या महापालिकेसाठी प्रशासकीय हालचाली सुरू

लोकसभेसाठी कोण इच्छुक आहे, याची माहिती माध्यमांतूनच मिळत आहे. उमेदवार कोण असेल हे केंद्रीय स्तरावरच निश्चित होईल. निवडणुकीची तयारी करणे अयोग्य नाही. उमेदवार कोण असेल हे लवकरच स्पष्ट होईल. प्रदेश पातळीवरून आदेश आल्यास निवडणुकीची प्रक्रिया राबविण्यात येईल, असे घाटे यांनी सांगितले. पक्षाच्या पदाधिकाऱ्याला तिकीट मिळेल, असेही उत्तर त्यांनी दिले.

First published on: 29-01-2024 at 21:25 IST