पुणे : गंज पेठेतील लोहियानगर परिसरात दहशत माजविणारा गुंड अभिषेक ससाणे याच्याविरुद्ध पोलीस आयुक्त अमितेश कुमार यांनी झोपडपट्टी दादा प्रतिबंधक कायद्यान्वये (एमपीडीए) कारवाई करण्याचे आदेश दिले. लोहियानगर भागातील अभिषेक ऊर्फ बुचड्या देविदास ससाणे (वय २२, रा. लोहियानगर) याच्याविरुद्ध खडक आणि लष्कर पोलीस ठाण्यात खुनाचा प्रयत्न, दुखापत, बेकायदा शस्त्र बाळगून जीवे मारण्याची धमकी देणे, खंडणी मागणे, सरकारी कामात अडथळा आणणे अशा स्वरूपाचे गंभीर गुन्हे दाखल आहेत.
ससाणेच्या गुन्हेगारी कारवायांना आळा घालण्यासाठी प्रतिबंधात्मक कारवाई करण्यात आली होती. कारवाई केल्यानंतरही त्याच्या वर्तनात सुधारणा झालेली नव्हती. तो नागरिकांना दमदाटी करणे, शस्त्र बाळगून दहशत निर्माण करणे, शस्त्राचा धाक दाखवून लूटमार, प्रतिकार केल्यास हल्ला करणे अशा प्रकारचे गुन्हे करत होता. त्याच्या दहशतीमुळे लोहियानगर भागातील नागरिक आणि व्यापारी पोलिसांकडे तक्रार देण्यास घाबरत होते.
ससाणेविरुद्ध एमपीडीए कारवाई करण्याचा प्रस्ताव वरिष्ठ पोलीस निरीक्षक शशिकांत चव्हाण यांनी तयार केला. पोलीस आयुक्त अमितेश कुमार यांना प्रस्ताव सादर करण्यात आला. पोलीस आयुक्तांच्या आदेशाने ससाणे याला वर्धा मध्यवर्ती कारागृह येथे स्थानबद्ध करण्याचे आदेश देण्यात आले. पोलीस आयुक्त अमितेश कुमार, तत्कालीन अतिरिक्त पोलीस आयुक्त प्रवीणकुमार पाटील, उपायुक्त संदीपसिंग गिल, सहायक आयुक्त अनुजा देशमाने यांचे मार्गदर्शनाखाली वरिष्ठ पोलीस निरीक्षक शशिकांत चव्हाण, गुन्हे शाखेच्या पोलीस निरीक्षक शर्मिला सुतार, मनोजकुमार लांडे, सहायक निरीक्षक हर्षल कदम, हवालदार संतोष बोरात, पोलीस शिपाई चंद्रशेखर खरात, इरफान नदाफ, देवकर, लांडगे यांनी ही कारवाई केली.
