पुणे : संततधार पावसामुळे पालेभाज्यांना फटका बसला आहे. लागवड कमी झाल्याने कोथिंबीर, मेथी, पालकासह सर्व पालेभाज्यांची आवक कमी प्रमाणावर होत आहे. कोथिंबिरीसह मेथी, पालक या पालेभाज्यांना उच्चांकी दर मिळाला आहे. किरकोळ बाजारात प्रतवारीनुसार कोथिंबिरीच्या एका जुडीला ६० ते ८० रुपये दर मिळाला आहे. मेथी जुडीला ५० रुपये दर मिळाला असून, पालकही तेजीत आहे.
पुणे विभागात पावसाची संततधार आहे. पावसामुळे पालेभाज्यांच्या प्रतवारीवर परिणाम झाला आहे. सध्या मागणीच्या तुलनेत पालेभाज्यांची आवक कमी प्रमाणात होत आहे. कोथिंबीर, मेथी, पालकसह सर्व पालेभाज्यांचे दर तेजीत असल्याची माहिती छत्रपती श्री शिवाजी मार्केट यार्डमधील पालेभाजी व्यापारी राजेंद्र सूर्यवंशी यांनी दिली.
पुणे विभागातून सध्या पालेभाज्यांची आवक कमी प्रमाणावर होत आहे. पावसामुळे पालेभाज्या खराब होण्याचे प्रमाण मोठे आहे. पालेभाज्या डागाळल्या आहेत. चांगल्या प्रतीच्या पालेभाज्यांना दर मिळाले आहेत. घाऊक बाजारात मेथी, कोथिंबीर, पालकासह सर्व पालेभाज्यांच्या दरात वाढ झाली आहे. पालेभाज्यांची नवीन लागवड होण्यास किमान महिनाभराचा कालावधी लागणार आहे. त्यामुळे पालेभाज्यांचे दर गणेशोत्सवापर्यंत तेजीत राहणार आहेत, असे त्यांनी नमूद केले.
हे ही वाचा…सुषमा अंधारे यांना ‘या’ मतदारसंघात उमेदवारी मिळावी म्हणून पुण्यात लागले फ्लेक्स
कोथिंबीर, मेथी या पालेभाज्यांना मागणी वाढली आहे. पुणे विभागात संततधार पाऊस सुरू असल्याने पालेभाज्या खराब झाल्या आहेत. मार्केट यार्डातील घाऊक बाजारात कोथिंबिरीच्या एका जुडीचा दर ४० ते ४५ रुपयांपर्यंत आहे. वाहतूक खर्च, हमाली असे खर्च विचारात घ्यावे लागतात. परराज्यांतून होणारी कोथिंबिरीची आवक सध्या बंद आहे. पावसामुळे लातूर भागातील कोथिंबिरीचे नुकसान झाले आहे. किरकोळ बाजारात कोथिंबीर, मेथी, पालकवगळता अन्य पालेभाज्यांचे दर २५ ते ४० रुपयांपर्यंत आहेत. प्रकाश ढमढेरे, भाजीपाला व्यापारी, किरकोळ बाजार पुणे विभागात सुरू असलेल्या संततधार पावसामुळे पालेभाज्या खराब झाल्या आहेत. नवीन लागवडीस किमान महिनाभराचा कालावधी लागणार आहे. गणेशोत्सवातही पालेभाज्या तेजीत राहण्याची शक्यता आहे. राजेंद्र सूर्यवंशी, श्री छत्रपती शिवाजी मार्केट यार्ड
पालेभाज्यांचे दर
कोथिंबिर – ६० ते ८० रुपये
पालक – ६० ते ७० रुपये
मेथी – ५० रुपये
