पुणे : शहरातील शालेय विद्यार्थ्यांची खासगी वाहनांमधून परवान्याशिवाय वाहतूक होत आहे. त्यामुळे विद्यार्थ्यांच्या सुरक्षिततेचा प्रश्न निर्माण झाला असून, उपप्रादेशिक परिवहन विभागाने (आरटीओ) विशेष तपासणी मोहीम हाती घेतली आहे. मर्यादेपेक्षा जास्त विद्यार्थ्यांची वाहतूक करणाऱ्या अधिकृत वाहनचालकांवरही कारवाई करण्यात येणार असल्याचे या वेळी स्पष्ट करण्यात आले आहे. त्यासाठी ‘आरटीओ’कडून वायुवेग पथके तैनात करण्यात आली आहेत.
परिवहन विभागाच्या निर्देशांनुसार, शालेय विद्यार्थ्यांच्या सुरक्षित वाहतुकीसाठी नियमावली तयार करण्यात आली आहे. त्यानुसार पुणे आणि पिंपरी चिंचवडमध्ये १० हजार ८०० बस आणि व्हॅन यांना आरटीओकडून परवानगी देण्यात आली आहे, तर दोन हजार १६२ वाहनधारकांनी अद्याप वाहन स्वास्थ्य तपासणी प्रक्रिया पूर्ण केलेली नाही. यापैकी काही वाहने अजूनही शालेय विद्यार्थ्यांची वाहतूक करत आहेत, तर काही वाहतूक परवाना नसणाऱ्या खासगी वाहनांमधून (पांढरी क्रमांक पाटी) होत आहे. त्यामुळे शालेय विद्यार्थ्यांच्या जीविताला धोका निर्माण होण्याची शक्यता नाकारता येत नसून, आरटीओकडे याबाबत तक्रारी प्राप्त झाल्या आहेत.
त्या पार्श्वभूमीवर, आरटीओ प्रशासनाने विद्यार्थ्यांची बेकायदा वाहतूक करणाऱ्या वाहनांची तपासणी मोहीम हाती घेतली आहे. त्यासाठी वायुवेग पथके तैनात करण्यात आली आहेत. या तपासणी मोहिमेत अधिकृत शालेय बस, व्हॅनचीदेखील तपासणी करण्यात येणार आहे. व्यावसायिक परवाने, विमापत्र, वाहन स्वास्थ्य प्रमाणपत्र, सुरक्षित वाहतुकीसाठी पायऱ्या, बैठक व्यवस्था, मर्यादेनुसार विद्यार्थ्यांची संख्या, अग्निप्रतिबंधात्मक उपकरण सुविधा आणि इतर उपाययोजनांची अंमलबजावणी केली आहे किंवा नाही आदी बाबी तपासणीदरम्यान पडताळल्या जात आहेत.
शाळांना व पालकांना आवाहन
पुणे शहरातील शाळा व्यवस्थापन समितीने आणि पालकांनी विद्यार्थ्यांची ने-आण करणारी वाहने खासगी आहेत किंवा नाहीत, याची खातरजमा करावी. वाहन क्रमांकाची पाटी (नंबर प्लेट) पांढऱ्या रंगाची असल्यास ती बेकायदा असून अशा वाहनांमधून पाल्यांना पाठवू नये, असे आवाहन आरटीओ प्रशासनाकडून करण्यात आले आहे.
शालेय विद्यार्थ्यांची खासगी वाहनांतून वाहतूक बिनदिक्कतपणे सुरू असल्याच्या तक्रारी मोठ्या प्रमाणात प्राप्त झाल्या आहेत. अशी बेकायदा वाहतूक होत आहे किंवा नाही, याची तपासणी करण्यासाठी विशेष मोहीम आखण्यात आली आहे. त्यानुसार वायुवेग पथकाच्या माध्यमातून तपासणी सुरू केली आहे. – स्वप्नील भोसले, उपप्रादेशिक परिवहन अधिकारी, पुणे
