इंदापूर नगराध्यक्षपदासाठी भरत शहा रिंगणात? राजकीय पक्षांच्या हालचाली सुरू

भरत शहा मित्र परिवाराच्या वतीने इंदापूरजवळील प्राचीन नृसिंह मंदिरात अभिषेक करण्यात आला. यानिमित्ताने शहरातील व्यावसायिक, सामाजिक कार्यकर्ते आणि मोठ्या प्रमाणात युवक उपस्थित होते. त्याद्वारे शहा यांनी शक्तिप्रदर्शन केले. या कार्यक्रमाला मुकुंद शहा, अंगद शहा उपस्थित होते. नागरिकांच्या सहभागामुळे या धार्मिक कार्यक्रमाला राजकीय स्वरूप प्राप्त झाले.

शहा परिवाराचे इंदापूरच्या सामाजिक, शैक्षणिक, व्यापारी आणि नगरविकास क्षेत्रातील योगदान गेल्या दोन दशकांपासून राहिले आहे. शहा यांच्या भावजय अंकिता मुकुंद शहा यांच्या नगराध्यक्षपदाच्या काळात इंदापूर नगरपरिषदेला राष्ट्रीय स्तरावर स्वच्छ भारत अभियानांतर्गत सलग पाच वर्षे पुरस्कार मिळाले. त्या काळात नगरपरिषदेच्या कारभारात अनेक विकासकामे करण्यात आली. नवीन व्यापारी संकुल, अत्याधुनिक नगरपरिषद भवन, पिण्याच्या पाण्याचा पुरवठा, रस्ते, कचरा व्यवस्थापन प्रणाली आणि ऑक्सिजन पार्क यांसारखे प्रकल्प उभारण्यात आले.

भरत शहा हे सहकार क्षेत्रात सक्रिय असून कर्मयोगी शंकरराव पाटील सहकारी साखर कारखान्याचे उपाध्यक्ष म्हणून कार्यरत आहेत. शिक्षण क्षेत्रातही त्यांचे योगदान आहे. सतत नागरिकांशी संपर्क ही त्यांची जमेची बाजू आहे. ते नगराध्यक्ष पदासाठी इच्छुक असल्याने या पदासाठी चुरस निर्माण झाली आहे.

इंदापूर नगरपरिषद निवडणुकीत अनेक स्थानिक गट सक्रिय झाले असून, नगराध्यक्ष पदासाठी काही माजी नगरसेवक, व्यावसायिक आणि सामाजिक कार्यकर्त्यांची नावे चर्चेत आहेत. या पार्श्वभूमीवर शहा यांच्या संभाव्य उमेदवारीमुळे या पदाच्या निवडणुकीला रंगत येण्याची चर्चा सुरू झाली आहे.

शहा यांनी कोणत्याही राजकीय पक्षाच्या उमेदवारीबाबत घोषणा केलेली नाही. ते नगराध्यक्षपदाची निवडणूक लढविणार असल्याचे निश्चित झाले आहे. याबाबत शहा म्हणाले, ‘शहराच्या विकासासाठी तत्पर आहे. निर्णय योग्य वेळी जाहीर केला जाईल.’

अद्याप राजकीय समीकरणे स्पष्ट झाली नसली, तरी इंदापूर नगराध्यक्षपदाच्या शर्यतीत भरत शहा यांच्या संभाव्य उमेदवारीमुळे चुरसीचे वातावरण निर्माण झाले आहे. शहा हे कोणत्या पक्षाकडून निवडणूक लढविणार, याबाबत अद्याप चित्र स्पष्ट झालेले नाही. मात्र, त्यांच्या संभाव्य उमेदवारीमुळे इंदापूरमधील राजकीय वातावरण तापले आहे.