कसबा पोटनिवडणुकीची गुरुवारी मतमोजणी; कोरेगाव पार्क भागातील मतमोजणी केंद्र परिसरात प्रतिबंधात्मक आदेश

मतमोजणी केंद्र परिसरात शस्त्र बाळगण्यास मनाई करण्यात आली आहे. शस्त्र परवाना असलेल्या व्यक्तींना शस्त्र बाळगण्यास मनाई करण्यात आली आहे. पोलीस, संरक्षण दल, कारागृह विभाग, बँक सुरक्षा विभाग, तसेच केंद्रीय आणि राज्य शासनाचे अधिकारी यांना शस्त्र बाळगण्याबाबत दिलेल्या आदेशातून सूट देण्यात आली आहे. मतमोजणी केंद्र परिसरात मोबाइल संच, बिनतारी दूरध्वनी यंत्रणा (काॅर्डलेस फोन) वापरण्यास मनाई करण्यात आली आहे. मतमोजणी केंद्र परिसरात पक्षाच्या कार्यकर्त्यांना ध्वनीवर्धक यंत्रणेचा वापर करण्यास मनाई करण्यात आल्याचे सहपोलीस आयुक्त संदीप कर्णिक यांनी सांगितले.

हेही वाचा – नागपुरात शिट्टी वाजवल्यानंतर चर्चांना उधाण, भाजपात प्रवेश करणार का? अमोल कोल्हे म्हणाले…

मतमोजणी केंद्र परिसरात कोणताही मजकूर लिहिण्यास किंवा छापील मजकूर चिटकवण्यास मनाई करण्यात आली आहे. शासकीय वाहने सोडून अन्य वाहनांना या परिसरात प्रवेश देण्यात येणार नाही, तसेच मतमोजणी केंद्रात अधिकृत परवानगी पत्र (पास) असलेल्या व्यक्तींना प्रवेश देण्यात येणार आहे.

हेही वाचा – पुणे : मिळकतीची परस्पर विक्री करून १५ कोटींची फसवणूक, बांधकाम व्यावसायिकांविरुद्ध गुन्हा

निकालानंतर विजयी मिरवणुकीस बंदी

मतमोजणी प्रक्रिया पूर्ण झाल्यानंतर विजयी उमेदवारांना विजय मिरवणूक काढण्यास मनाई करण्यात आली आहे. प्रतिबंधात्मक आदेशाचा भंग करणाऱ्यांविरुद्ध कारवाई करण्यात येईल, असे सहपोलीस आयुक्त संदीप कर्णिक यांनी दिलेल्या आदेशात नमूद केले आहे.