पुणे : पुरंदर येथील प्रस्तावित आंतरराष्ट्रीय विमानतळासाठी तीन गावांतील मोजणीप्रक्रिया पूर्ण झाली आहे. मुंजवडी, उदाचीवाडी आणि एखतपूर या गावांतील ही प्रक्रिया पूर्ण झाली असून, ८०७ एकर जागा लवकरच जिल्हा प्रशासनाच्या ताब्यात येणार आहे. दरम्यान, येत्या शनिवारपासून कुंभारवळण, खानवडी या दोन गावातील मोजणी सुरू करण्यात येणार असल्याची माहिती जिल्हा प्रशासनाकडून देण्यात आली.
पुरंदर येथील प्रस्तावित आंतरराष्ट्रीय विमानतळासाठी संमतिपत्रे दिलेल्या शेतकऱ्यांच्या जमिनीची मोजणीप्रक्रिया जिल्हा प्रशासनाकडून सुरू करण्यात आली आहे. पहिल्या दिवशी पोलीस बंदोबस्तामध्ये मुंजवडी, उदाचीवाडी आणि एखतपूर या गावांतील ५० हेक्टर जमिनीची मोजणीप्रक्रिया पूर्ण करण्यात आली होती. मोजणीप्रक्रिया सुरू झाल्यानंतर काही दिवसांतच मुंजवडीतील ७७ हेक्टर, एखतपूरमधील २०१ हेक्टर आणि उदाचीवाडी येथील ४५ हेक्टर अशी एकूण ३२३ हेक्टर म्हणजेच ८०७ एकर जमिनीची मोजणी पूर्ण झाली आहे.
पुरंदर तालुक्यातील सात गावांतील मोजणीसाठी सहा पथके स्थापन करण्यात आली आहेत. महसूल, वन, सार्वजनिक बांधकाम विभाग, कृषी विभाग, महाराष्ट्र जीवन प्राधिकरण, पुरंदर उपसा सिंचन योजोतील अधिकाऱ्यांचा या पथकामध्ये समावेश आहे. फळझाडे, शेतविहिरी आणि जलवाहिन्यांचे मूल्यांकन मोजणी प्रक्रियेत करण्यात येत आहे. ही सर्व प्रक्रिया शांततेत सुरू असल्याची माहिती जिल्हा प्रशासनाकडून देण्यात आली.
दरम्यान, पुरंदर विमानतळासाठी पारगाव, कुंभारवळण, एखतपूर, मुंजवडी, खानवडी, उदाचीवाडी आणि वनपुरी अशा सात गावांमधून जमीन संपादित होणार आहे. विमानतळासाठी एकूण तीन हजार एकर जमीन संपादित करण्यात येणार आहे. संमतिपत्रे देण्याच्या कालावधीत ३ हजार २२० शेतकऱ्यांनी २ हजार ८१० एकर जागेचे संपादन करण्यासंदर्भातील संमतिपत्रे सादर केली आहेत. त्यानुसार ९५ टक्के जागा ताब्यात येण्याचा मार्ग मोकळा झाला आहे. मोजणीप्रक्रिया पूर्ण झाल्यानंतर दरनिवाडा निश्चित करून शेतकऱ्यांना देण्यात येणारा मोबदला आणि परताव्याबाबत सरकारकडे प्रस्ताव पाठविण्यात येणार आहे. त्यानंतर थेट भूसंपादनाची प्रक्रिया सुरू करण्यात येणार आहे.
