पुरंदर विमानतळासाठी उद्यापासून प्रत्यक्ष मोजणी; ९५ टक्के शेतकऱ्यांची संमतिपत्रे दाखल; आज अंतिम मुदत

पुरंदर विमानतळासाठी पारगाव, कुंभारवळण, एखतपूर, मुंजवडी, खानवडी, उदाचीवाडी आणि वनपुरी अशा सात गावांमधून जमीन संपादित होणार आहे. विमानतळाला होणाऱ्या विरोधामुळे सरकारने साडेसातऐवजी तीन हजार एकर जमीन संपादित करण्याचा निर्णय गेल्या महिन्यात घेतला होता. त्यानुसार सहमती संमतिपत्रे देण्यासाठी १८ सप्टेंबरपर्यंतची मुदत देण्यात आली होती. या कालावधीत २ हजार ८०० शेतकऱ्यांनी सुमारे २ हजार ७०० एकर जमीन देण्याची संमती दिली. त्यानंतर संमतिपत्रे देण्यासाठी गुरुवारपर्यंत (२५ सप्टेंबर) मुदतवाढ देण्यात आली. त्यानुसार आतापर्यंत ९५ टक्के शेतकऱ्यांनी विमानतळासाठी जागा देण्याची तयारी दर्शविली असून, संमतिपत्रे जिल्हा प्रशासनाला दिली आहेत.

विमानतळासाठी सुमारे तीन हजार एकर जमीन घेण्याचे नियोजन आहे. मोजणीप्रक्रिया पूर्ण झाल्यानंतर दरनिवाडा निश्चित करून शेतकऱ्यांना देण्यात येणारा मोबदला आणि परताव्याबाबत सरकारकडे प्रस्ताव पाठविण्यात येणार आहे. त्यानंतर थेट भूसंपादनाची प्रक्रिया सुरू करण्यात येणार आहे. पुरंदर तालुक्यातील सातही गावांंमध्ये सरकारच्या मालकीची सुमारे २०० एकर जमीन उपलब्ध आहे. त्यामुळे भूसंपादित जमिनीसह विमानतळासाठी सुमारे २९०० एकर जमीन उपलब्ध होणार आहे.

दरम्यान, संमतीने जमीन देणाऱ्या शेतकऱ्यांना ‘प्रथम येणाऱ्यांना प्रथम प्राधान्य’ या तत्त्वावर ‘एरोसिटी’त एकूण जमिनीच्या दहा टक्के विकसित भूखंडांचे वाटप करण्यात येणार आहे. त्यासाठी विमानतळाच्या परिसरात सुमारे ७०० एकर जागा राखीव ठेवण्यात येणार आहे. त्यानुसार विमानतळासाठी सहमतीने जमीन देणाऱ्या शेतकऱ्यांना मोबदल्यापोटी एकूण जमिनीच्या दहा टक्के विकसित भूखंड आणि बाजारभावाच्या चौपट दराने मोबदला देण्यात येणार असल्याची माहिती जिल्हा प्रशासनाकडून देण्यात आली.

‘संमतिपत्रे देण्याची मुदत संपुष्टात आल्यानंतर शुक्रवारपासून प्रत्यक्ष जमीनमोजणीस सुरुवात करण्यात येणार आहे. २० ऑक्टोबरपर्यंत ही प्रक्रिया पूर्ण करण्यात येईल.’ जितेंद्र डुडी,जिल्हाधिकारी, पुणे</strong>