पुणे : साप्ताहिक सुट्ट्यांच्या कालावधीत सार्वजनिक वाहूतक व्यवस्थेला अल्प प्रतिसाद असल्याने गर्दी असलेल्या पर्यटन आणि धार्मिक ठिकाणी अतिरिक्त सेवा वाढवली. या निर्णयामुळे पुणे महानगर परिवहन महामंडळाच्या (पीएमपी) उत्पन्नात लक्षणीय वाढ होत अर्थचक्राला गती मिळाली आहे. ‘पीएमपी’ प्रशासनाच्या गेल्या सहा महिन्यांपैकी सर्वाधिक जून महिन्यात सुमारे साडेसहा लाख रुपयांपर्यंत कमाई केली आहे.

‘पुणे दर्शन’ आणि ‘पर्यटन बस’ सेवेच्या माध्यमातून ‘पीएमपी’ने मे महिन्यात ४.७५ लाख रुपये उत्पन्न मिळवले होते, तर स‌र्वाधिक कमी १.५६ लाख रुपये उत्पन्न एप्रिल महिन्यात मिळाले असल्याची माहिती ‘पीएमपी’ प्रशासनाकडून देण्यात आली.

पुणे, पिंपरी चिंचवड आणि उपनगरातील शाळा, महाविद्यालये, सरकारी-खासगी कार्यालये तसेच औद्योगिक आणि आयटी क्षेत्रातील कंपन्यांना शनिवार, रविवार सुट्टी असते. त्यामुळे दैनंदीन संचलनातील ‘पीएमपी’च्या मार्गिकांवर प्रवाशांचा अल्प प्रतिसाद असतो. परिणामी महसुलावर परिणाम होत असल्याने पीएमपी प्रशासनाने अल्प प्रतिसाद असलेल्या मार्गांवरील सेवेची वारंवारिता कमी केली, तर जिल्ह्यातील पर्यटन स्थळांपैकी कानिफनाथ गड, संगमेश्वर मंदिर (सासवड), जेजुरी दर्शन, कोंढणपूर, बनेश्वर, निळकंठेश्वर, सिंहगड पायथा, रामदरा, तुळापूर, भंडारा डोंगर पायथा, हडशी कमान, प्रतिशिर्डी, चिन्मय विभूतीयोग साधना केंद्र, श्री क्षेत्र खंडोबा मंदिर (निवगाव दावडी), श्री गजानन महाराज मठ (आळंदी) अशा अनेक ठिकाणी आरामदायी, सुलभ व माफक दरात अतिरिक्त पीएमपी सेवा उपलब्ध केली आहे.

या ठिकाणांवर धार्मिक, पर्यटन आणि निसर्गप्रेमींची गर्दी असल्याने १५ ते २० प्रवाशांनी एकत्रित आरक्षण केल्यावरही अतिरिक्त बस सेवा उपलब्ध करून देण्याचा पर्याय उपलब्ध करून दिला. त्यामुळे पीएमपीच्या पुणे दर्शन आणि पर्यटन सेवेला प्रवाशांचा उत्स्फूर्त प्रतिसाद मिळत असल्याचे पीएमपीला मिळालेल्या उत्पन्नावरून समोर येत आहे.

सहा महिन्यात २० लाख पार

पीएमपीच्या पुणे दर्शन आणि पर्य़टन बस या सेवा गेल्या अनेक वर्षांपासून नियमित सुरू असून जानेवारी महिन्यात ३.४७ लाख रुपयांचे उत्पन्न मिळाले, फेब्रुवारीत २.१७ लाख, मार्च २.३६ लाख, जून २.३६ लाख, एप्रिल १.५६ लाख, मे ४.७५ लाख, तर जून महिन्यात सर्वाधिक ६.४८ लाख असे एकूण २०.८० लाख उत्पन्न मिळाले आहे.

This quiz is AI-generated and for edutainment purposes only.

सुट्ट्यांच्या कालावधीत अल्प प्रतिसाद असलेल्या मार्गांवरील सेवा कमी करून गर्दी असलेल्या पर्यटन स्थळांवर मे महिन्यापासून ‘पीएमपी’ सेवा वाढविण्याचा निर्णय घेण्यात आला. तसेच सामुहिक आरक्षणाचा पर्याय सुरू केला. या सेवांना प्रवाशांचा चांगला प्रतिसाद मिळत आहे. दीपा मुधोळ-मुंडे, अध्यक्ष तथा व्यवस्थापकीय संचालक, पीएमपीएमएल.