पुणे : कोजागिरी पौर्णिमेनिमित्त दुधाच्या मागणीत मोठी वाढ झाली. गेल्या वर्षीच्या तुलनेत यंदा कोजागिरीला दुधाची आवक वाढली. घाऊक दूध बाजारात एक लिटर दुधाला ८० रुपये लिटर असा भाव मिळाला. गणेश पेठेतील दूध बाजारात (दूध भट्टी) सोमवारी अडीच ते तीन हजार लिटर दुधाची आवक झाली.
सार्वजनिक मंडळे, विविध संस्था सोसायट्यांकडून सार्वजनिक स्वरुपात कोजागिरी पौर्णिमा सोमवारी साजरी करण्यात आली. यंदा कोजागरी पौर्णिमा दाेन दिवस आहे. त्यामुळे मंगळवारी (७ ऑक्टोबर) दुधाला मागणी राहील. विविध मंडळे, संस्था, सोसायट्यांकडून दुधाला मागणी मोठ्या प्रमाणावर होती. डेअरी चालकांकडून दूध खरेदी करण्यात आले. गेल्या वर्षीच्या तुलनेत यंदा दुधाची आवक वाढली.
अरण्येश्वर, खडकी, लष्कर, मुंढवा येथील गवळीवाडा, नगर रस्त्यावरील वाडेबोल्हाई, वाघोली, केसनंद परिसर, भोर, वेल्हा, नसरापूर येथून दुधाची आवक झाली. घाऊक दूध बाजारात १८ लिटर दुधाच्या घागरीला १४५० रुपये भाव मिळाला. गेल्या वर्षी १५०० रुपये भाव मिळाला होता. गेल्या वर्षीच्या तुलनेत दुधाची आवक चांगली झाली, तसेच भावही कमी आहेत.
गेल्या वर्षी कोजागिरीला एक लिटर दुधाला ८३ रुपये असा भाव मिळाला होता, अशी माहिती गणेश पेठेतील दूध बाजार खरेदी-विक्री संघाचे अध्यक्ष रामदास काळे आणि उपाध्यक्ष दामोदर हिंगमिरे यांनी दिली.
दिवाळीत मिठाई विक्रेत्यांकडून मागणी
नवरात्रोत्सवापासून दिवाळीपर्यंत दुधाला मागणी चांगली असते. दिवाळीत मिठाई विक्रेत्यांकडून दुधाला मागणी वाढते. पुणे शहर आणि जिल्ह्यात शहरी करण वाढत आहे. उपनगरातील गवळी वाडे कमी होत चालले आहेत अनेक जणांनी जमिनीची विक्री केली. त्यामुळे म्हशी, गाई पालनासाठी लागणार्‍या गोठ्यांसाठी जागा उपलब्ध नाही, असे गणेश पेठ दूध बाजार-खरेदी विक्री संघाचे अध्यक्ष रामदास काळे, उपाध्यक्ष दामाेदर हिंगमिरे यांनी नमूद केले.
घाऊक दूध बाजारातील दर
- १८ लिटर घागर – १४५० रुपये
- एक लिटर दूध – ८० रुपये
